Nafta kërcen 5% pas goditjes në Ngushticën e Hormuzit dhe sulmeve amerikane ndaj Iranit

Tensioni ushtarak mes SHBA-së dhe Iranit u shndërrua menjëherë në goditje për tregjet botërore të energjisë. Çmimet e naftës u rritën me gati 5% të hënën herët, pasi doli lajmi se Irani kishte goditur anije tregtare në Ngushticën e Hormuzit, në një kohë kur Uashingtoni po ndërmerrte sulme të reja ndaj Teheranit.

Nafta e papërpunuar Brent u tregtua mbi 79 dollarë për fuçi, sipas BBC-së. Rritja pasqyron frikën e tregjeve për një ndërprerje të furnizimeve nga një prej korridoreve më kritike të botës për naftën.

Ngushtica e Hormuzit, në jug të Iranit, është arteria kryesore nga ku kalon zakonisht rreth një e pesta e naftës dhe gazit në botë. Teherani e kishte mbyllur në mënyrë efektive këtë rrugë ujore si përgjigje ndaj fillimit të luftës mes SHBA-së, Izraelit dhe Iranit në fund të shkurtit.

Pavarësisht kërcimit të fundit, çmimet mbeten dukshëm nën kulmin e arritur në fillim të konfliktit, kur fuçia iu afrua vlerës prej gati 120 dollarësh. Për krahasim, para se të shpërthente lufta, nafta tregtohej rreth 70 dollarë për fuçi.

Ecuria e çmimeve në ditët në vijim do të varet drejtpërdrejt nga zhvillimet në terren dhe nga fati i Ngushticës së Hormuzit, e cila mbetet pika më e ndjeshme e tregut ndërkombëtar të energjisë.