Lista e 20 paramilitarëve në Kishnicë: shtabi nga ku dyshohet se nisnin krimet

Në nëntor 1999, në një shtëpi në Kishnicë, afër Prishtinës, u gjet një listë me emrat e 20 paramilitarëve serbë. Burrat në listë dyshohen se kanë kryer krime ndaj popullatës civile shqiptare gjatë luftës në Kosovë.

Shtëpia, pronë e një banori të fshatit, ishte shndërruar në shtab operativ të paramilitarëve. Sipas dëshmive të shumta, grupet niseshin nga kjo bazë drejt shumë zonave të Kosovës, ku kryenin krime ndaj civilëve shqiptarë.

Emrat dhe adresat e shënuara në listë tregojnë se pothuajse të gjithë ishin nga vetë Kosova. Vetëm njëri vinte nga Kurshumlia. Shumica figurojnë me banim në Kishnicë, ndërsa të tjerët nga Graçanica, Prishtina, Preloci i Prishtinës, Prilluzha, Hallaqi i Madh dhe Skullani i Lipjanit.

Krimet nuk mbetën larg shtabit. Një pjesë e tyre dyshohet se ka vepruar edhe në vetë Kishnicën, ku dy banorë që i shpëtuan masakrës kanë dëshmuar për ato që ndodhën në fshat. Nuk dihet nëse ndonjëri prej të dyshuarve është ndjekur ndonjëherë penalisht.