Kremlini: Putini dhe Trump biseduan një orë në telefon për luftën në Ukrainë

Presidenti rus Vladimir Putin i ka thënë presidentit amerikan Donald Trump se çfarë mund të bëjë Uashingtoni për t'i dhënë më shpejt fund luftës në Ukrainë. Ky është versioni i Kremlinit për një bisedë telefonike që, sipas zyrës presidenciale ruse, zgjati një orë.

Për bisedën njoftuan të martën autoritetet ruse. Në një konferencë për shtyp, Kremlini deklaroi se presidenti amerikan u fokusua në arritjen e një fundi të shpejtë të luftës në Ukrainë. Në një deklaratë të Moskës thuhet se përfundimi i luftës do të hapte menjëherë mundësinë për riparimin e marrëdhënieve mes Rusisë dhe Shteteve të Bashkuara, një ide që, sipas Kremlinit, Putini e mbështeti.

Zyra presidenciale në Kremlin e përshkroi bisedën si "jashtëzakonisht e çiltër", pra tejet e hapur dhe e sinqertë. Në të njëjtin njoftim thuhet se Putini deklaroi se Rusia nuk ka plane armiqësore, respektivisht agresive, ndaj Europës.

Kontakti telefonik ndodhi pasi të dërguarit e posaçëm të Trumpit, dhëndri i tij Jared Kushner dhe biznesmeni Steve Witkoff, kishin raportuar për udhëtimin e tyre në Moskë dhe Kiev. Deri tani, konfirmimin për bisedën dhe të dhënat për temat e diskutuara i ka dhënë vetëm pala ruse; nga Uashingtoni nuk është përcjellë një konfirmim i tillë, ndërsa ora e saktë e bisedës nuk është bërë e ditur.

Konteksti i këtyre kontakteve mbetet lufta më e gjatë në kontinentin europian në dekadat e fundit. Rusia pushtoi Krimenë dhe pjesë të qarkut Luhansk dhe Donjeck në Ukrainën Lindore në vitin 2014, ndërsa më 24 shkurt 2022 nisi pushtimin në përmasa të plota. Lufta ka shkaktuar humbje të mëdha ushtarake dhe godet rëndë popullatën civile.