Kallashnikov në mes të rrugës në Podujevë: nis gjykimi për tentativë vrasjeje

Një veturë që del në kalim të kundërt, kthehet dhe tejkalon një tjetër. Një xham që ulet. Pastaj një stupcë, kërcënime dhe të shtëna me armë automatike në mes të rrugës. Kjo është skena që aktakuza përshkruan për ngjarjen e 31 gushtit 2020 në Podujevë, për të cilën të premten paradite nisi seanca gjyqësore në Gjykatën Themelore në Prishtinë.

Para gjykatës janë G.M. dhe A.M., të akuzuar për veprën penale të vrasjes së rëndë në tentativë. Sipas aktakuzës, ata në bashkëkryerje kanë tentuar t'ua marrin jetën tre personave, me inicialet F.B., L.D. dhe Q.B., duke vënë në rrezik edhe jetën e njerëzve të tjerë. Të akuzuarit konsiderohen të pafajshëm deri në një vendim përfundimtar të gjykatës.

Aktakuza e rindërton ngjarjen hap pas hapi. Te vendi i quajtur Kutlesh, një veturë ka ardhur nga drejtimi i kundërt, është kthyer pas të dëmtuarve dhe i ka tejkaluar. Në atë moment, sipas aktakuzës, G.M. ka hapur xhamin dhe u ka thënë: "ndaluni qitu se kena me fol diçka".

Të dëmtuarit u ndalën në një udhëkryq me veturën e tyre të markës BMW. Në Mercedesin përballë, sipas akuzës, ndodheshin katër të pandehur, me A.M. në timon. F.B. dhe L.D. dolën nga BMW-ja, ndërsa i pari nga Mercedesi zbriti G.M., i cili, sipas aktakuzës, i kërcënoi vazhdimisht.

Më pas nga vetura doli B.S., një tjetër i pandehur, me një stupcë në dorë dhe u nis drejt të dëmtuarve. Aktakuza thotë se G.M. ia mori stupcën nga dora. Pikërisht atëherë, sipas akuzës, nga Mercedesi doli edhe një i pandehur i katërt, gjithashtu me inicialet A.M., i cili shtiu me një armë automatike kallashnikov në drejtim të të dëmtuarve, duke rrezikuar edhe kalimtarët e rastit.

Një nga provat kryesore në këtë proces pritet të jenë pamjet e kamerave të sigurisë, të cilat kapin momentin kur shpërthejnë të shtënat. Avokati i të pandehurit që, sipas aktakuzës, mbante kallashnikovin, i ka cilësuar ato si pamje "si në filma aksion".