Kallas paralajmëron provokime të reja ruse, Moska mbyll konsullatën gjermane në Shën Petersburg

Rusia i ka hequr pëlqimin për punë konsullatës gjermane në Shën Petersburg dhe ka kërkuar që ajo të mbyllet më së voni deri më 18 shtator. Sipas njoftimit të Ministrisë ruse të Punëve të Jashtme, të gjithë të punësuarit duhet ta lënë Federatën Ruse deri në atë datë. Njëkohësisht, ministria u ka urdhëruar të gjitha qendrave kulturore gjermane "Goethe" ta ndërpresin veprimtarinë në Rusi.

Vendimi vjen në një ditë kur nga Brukseli erdhi një paralajmërim i drejtpërdrejtë. Përfaqësuesja e Lartë e Bashkimit Evropian për politikë të jashtme dhe siguri, Kaja Kallas, tha se Evropa duhet të jetë e gatshme për provokime të reja ruse dhe të forcojë kapacitetet e përgjigjes ndaj kërcënimeve hibride. "Duhet ta forcojmë mbrojtjen tonë, të mbrojmë demokracitë nga ndërhyrja e jashtme dhe kërcënimet hibride dhe të sigurojmë që Evropa të ketë kapacitetin dhe vendosmërinë të veprojë kur është e nevojshme", deklaroi ajo.

Kallas foli pas bisedës me kryeministrin e Lituanisë, Mindaugas Sinkevičius, për prioritetet e presidencës së ardhshme lituaneze me Këshillin e BE-së. Ajo paralajmëroi se sulmet hibride ruse po bëhen gjithnjë e më të hapura dhe më të papërgjegjshme dhe vlerësoi se, në prag të zgjedhjeve për Dumën Shtetërore, duhen pritur provokime të reja në tokën evropiane. "Ka gjasa të shohim edhe sulme të tjera, si ai në Lajpcig, dhe duhet të jemi të gatshëm të përgjigjemi", tha Kallas.

Sipas saj, Lituania është një nga vendet anëtare të BE-së më të ekspozuara ndaj sulmeve, përfshirë shkeljet e hapësirës ajrore, fushatat e dezinformimit dhe sabotazhet, dhe përvoja e saj duhet të ndihmojë në formësimin e një përgjigjeje të përbashkët evropiane. Kallas theksoi se strategjia e BE-së kundër kërcënimeve hibride, si dhe plani i veprimit për dronët dhe luftimin e tyre, duhet të japin mbrojtje praktike, ndërsa përvoja ukrainase nga fronti mund të ndihmojë në zhvillimin e kapaciteteve të nevojshme.

Ndërkohë, në Kiev u zhvilluan bisedimet e presidentit ukrainas Volodimir Zelensky me të dërguarit e posaçëm të presidentit amerikan, Steve Witkoff dhe Jared Kushner. Zelensky i falënderoi për vizitën, duke thënë se prej tri ditësh nuk ka pasur sulme ruse mbi kryeqytetin, dhe u tha: "Na keni mbrojtur më mirë me 'patriotët', ejani më shpesh".

Witkoff njoftoi në rrjetin X se në takim morën pjesë edhe këshilltarët për siguri kombëtare të Britanisë së Madhe, Gjermanisë dhe Francës, në mënyrë që edhe ata të bashkëpunojnë në krijimin e përparimit. "U arrit një përparim i konsiderueshëm, përfshirë një hap përpara në caktimin e bisedimeve shtesë trepalëshe. Presidenti (i SHBA-së, Donald) Trump po punon fort për ndalimin e vrasjeve dhe po punon për një paqe të qëndrueshme dhe të përhershme", theksoi ai. Sipas Witkoffit, ai dhe Kushner udhëtuan me urdhër të Trumpit në Moskë dhe Kiev, për ta lehtësuar dialogun shtesë për përfundimin e luftës ruso-ukrainase, ndërsa në takimin me Vladimir Putinin morën pjesë edhe zyrtarë të Këshillit amerikan të Sigurisë Kombëtare, të Departamentit të Shtetit dhe të Ministrisë së Financave. Financial Times, duke iu referuar burimeve të paemërtuara, raportoi se të dërguarit amerikanë u paraqitën ukrainasve versione të përditësuara të propozimeve të mëparshme amerikane të paqes, ku mospajtimi kryesor mbetet çështja e territorit të Donbasit.