Ish-drejtoresha e Auditimit në ASHNA: U largova nga puna pasi raportova keqpërdorime

Xhyldane Murtezi Kiçmari, ish-drejtoreshë e Njësisë së Auditimit të Brendshëm në Agjencinë e Shërbimeve të Navigacionit Ajror (ASHNA), pretendon se u largua nga puna si ndëshkim, pasi raportoi dyshime për keqpërdorime të parasë publike brenda agjencisë. Akuzat i ka bërë publike në një postim në Facebook, ku përmend katër zyrtarë të institucionit.

"Pra, e ndëshkuan me largim nga puna një grua që guxoi t’u thoshte jo abuzimit me paranë publike", ka shkruar ajo.

Sipas Murtezi Kiçmarit, zyrtarët me inicialet S.B., A.K., B.H. dhe S.G. i përdorën pozitat e tyre për ta nxjerrë jashtë institucionit. Ajo thotë se deri më tani ishte përqendruar te dëshmitë dhe argumentet që pohon se ua ka dorëzuar institucioneve kompetente për keqpërdorimet e dyshuara në ASHNA. Tani ka vendosur të flasë edhe për atë që e cilëson si aspekt gjinor të rastit të saj.

Peshën më të madhe të akuzave e bart ndaj dy prej tyre. Për S.G., ajo pretendon se ishte ai që nënshkroi vendimin për largimin e saj nga puna, me qëllim që të ruante pozitën e vet. Ish-drejtoresha kërkon që të shqyrtohen avancet për udhëtime zyrtare dhe përfitimet e tjera që, sipas saj, ai ka pasur pas largimit të saj.

Për B.H., ajo thotë se si anëtar i komisionit disiplinor e nënshkroi vendimin pa argumente dhe pa ndonjë shkelje të detyrave të punës nga ana e saj. Sipas Murtezi Kiçmarit, ai përfitoi drejtpërdrejt nga ky vendim, duke marrë pozitën e drejtorit të Departamentit të Trafikut Ajror, të cilën pohon se aktualisht e ushtron si ushtrues detyre.

Në qendër të pretendimeve të saj është edhe një kontratë me vlerë 5.5 milionë euro. Ajo pretendon se B.H. nënshkroi përshtatjen e kritereve të përzgjedhjes për këtë kontratë në kundërshtim me Ligjin për Prokurimin Publik, dhe thotë se edhe dëshmitë për këtë çështje i ka dorëzuar në institucionet kompetente.

Postimi mbyllet me një kritikë të ashpër ndaj asaj që ajo e sheh si mosveprim të institucioneve dhe mungesë mbrojtjeje për sinjalizuesit që raportojnë shkelje të dyshuara në sektorin publik.

"Atëherë, kush duhet të ndëshkohet? Të zëshmit që po i njoftojnë institucionet që duhet të veprojnë dhe t’i mbrojnë këta sinjalizues, e të cilët po ndëshkohen me largime nga puna dhe ndëshkime të formave tjera apo ata që po abuzojnë me pushtetin për përfitime personale dhe po i dëmtojnë të tjerët", ka shkruar ajo.

Pretendimet mbeten të sajat dhe nuk përbëjnë konstatim të pavarur për përgjegjësinë e personave të përmendur; nuk dihet ende nëse institucionet ku thotë se ka dorëzuar dëshmitë kanë hapur ndonjë hetim.