Gjyqi për spiunazh në favor të BIA-s: dy të akuzuar për informacione mbi UÇK-në dhe Reçakun

Informacione për eprorët e UÇK-së, për një spital ushtarak të kohës së luftës dhe për masakrën e Reçakut, të përcjella, sipas akuzës, te shërbimi sekret serb. Kjo është thelbi i rastit për të cilin pritet të nisë seanca gjyqësore ndaj B.Sh. dhe M.Q., të dy të akuzuar për veprën penale të spiunazhit.

Aktakuza është ngritur nga Prokuroria Speciale, e cila i dyshon të dy se kanë bashkëpunuar me Agjencinë e Inteligjencës dhe Sigurisë së Serbisë (BIA), duke mbledhur dhe përcjellë informacione të ndjeshme në favor të shtetit serb.

Për B.Sh., prokuroria pretendon se i ka dhënë BIA-s të dhëna për Ushtrinë Çlirimtare të Kosovës (UÇK) dhe eprorët e saj, për Spitalin Ushtarak të UÇK-së në Mollopolc të Shtimes, si dhe për masakrën e Reçakut.

Akuzat ndaj M.Q. shtrihen edhe në periudhën e pasluftës. Sipas aktakuzës, ai ka mbledhur dhe përcjellë informacione jo vetëm për luftën e UÇK-së, por edhe për pjesëtarë të Policisë së Kosovës, të AKI-së dhe të IPK-së, si dhe për dëshmitarë të Dhomave të Specializuara në Hagë.

Të dy të pandehurit e kanë mohuar fajësinë dhe janë deklaruar të pafajshëm për akuzat që u vihen në barrë. Ata gëzojnë prezumimin e pafajësisë deri në një vendim përfundimtar të gjykatës.