Grabitja me armë e vitit 2021 në Rrugën e Kombit: 36-vjeçari nga Puka shpallet në kërkim

Një 36-vjeçar nga Puka, i identifikuar me inicialet N. K., është shpallur në kërkim nga policia e Lezhës si njëri prej autorëve të dyshuar të një grabitjeje me armë zjarri të ndodhur në Rrugën e Kombit, në Mirditë.

Ngjarja daton më 31 gusht 2021. Sipas Policisë së Shtetit, atë ditë shtetasit A. K. iu mor një shumë parash nën kërcënimin e armës së zjarrit. Sa para iu morën viktimës nuk është bërë e ditur.

Identifikimi i të dyshuarit erdhi pas hetimeve të thelluara të Sektorit për Hetimin e Krimeve të Rënda, në bashkëpunim me Seksionin për Hetimin e Krimeve të Pasurisë në Drejtorinë Vendore të Policisë Lezhë. Hetimet u zhvilluan nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Lezhë.

Gjykata e Lezhës i ka caktuar N. K. masën e sigurisë "Arrest në burg". Megjithatë, i dyshuari nuk është në duart e policisë dhe kërkimet për kapjen e tij vazhdojnë.

Gjatë hetimeve, sipas policisë, është identifikuar edhe një shtetas tjetër që dyshohet se ka qenë i përfshirë në grabitje. Për arsye hetimore, autoritetet nuk kanë dhënë asnjë të dhënë për të.

Policia thotë se puna vijon për dokumentimin e plotë të ngjarjes dhe për identifikimin e autorëve të tjerë të mundshëm, ndërsa materialet procedurale i janë përcjellë Prokurorisë për veprime të mëtejshme.