Gjurmë gishtash në një Fiat Bravo të fundosur: dy italianë në pranga për vrasjen e shqiptarit

Gjurmët e gishtave në pjesën e pasme të një veture të nxjerrë nga uji dhe dhjetëra orë pamje nga kamerat e sigurisë i çuan hetuesit italianë te dy burra, 51 dhe 54 vjeç, tani të arrestuar nën dyshimin për vrasjen e një 35-vjeçari shqiptar me inicialet F.H., trupi i të cilit u gjet në kanalin Tergola, në provincën e Padovës.

Gjetja ndodhi më 8 shtator, në San Giorgio delle Pertiche. Në fund të kanalit ndodhej një Fiat Bravo pa targa. Trupi i pajetë ishte në ulëset e pasme, i mbështjellë me qese të zeza plastike dhe i mbuluar me goma e materiale të tjera, në një përpjekje të dukshme për ta fshehur.

Kthesa në hetim erdhi nga analizat teknike të veturës. Ekspertët gjetën gjurmë gishtash pikërisht në zonën ku dyshohet se vetura ishte shtyrë për t'u hedhur në kanal, dhe këto gjurmë ndihmuan në identifikimin e njërit prej të dyshuarve.

Në paralel, policia rindërtoi orët e fundit të viktimës përmes pamjeve të kamerave. Sipas tyre, 35-vjeçari kishte hyrë me veturë në një objekt industrial në Mirano, në provincën e Venecias, ku njëri prej të dyshuarve kishte në dispozicion një hapësirë që e përdorte si punishte. Që nga ai moment, ai nuk shfaqet më i gjallë në asnjë regjistrim.

Hetuesit dyshojnë se shqiptari u qëllua me pushkë në fytyrë, nga një distancë e afërt, dhe se vrasja ishte e paramenduar. Motivi, sipas tyre, lidhet me konflikte të lindura në kuadër të trafikut të lëndëve narkotike në territorin e Venecias.

Arrestimet u kryen nga karabinierët, pas hetimeve të autoriteteve italiane, raportoi televizioni publik italian Rai News. Gjatë hetimit, dy të dyshuarit kanë bashkëpunuar me autoritetet dhe kanë ndihmuar në gjetjen e një pushke të kalibrit 12, e cila dyshohet se është arma e krimit.

Ndaj tyre rëndojnë dyshimet për vrasje të rëndë të paramenduar, fshehje të kufomës dhe mbajtje të paligjshme të armës së zjarrit në bashkëpunim. Të dy janë dërguar në burgje të ndara, në Rovigo dhe në Verona, ndërsa hetimet vazhdojnë për të sqaruar plotësisht rrethanat e vrasjes dhe rolin që ka luajtur secili prej tyre.