Gjashtë policë të suspenduar në Shkup për dhunë ndaj dy të rinjve shqiptarë

Gjashtë punonjës policorë në Shkup janë larguar përkohësisht nga detyra. Zëvendësministri i Punëve të Brendshme, Astrit Iseni, nënshkroi të premten vendimet për suspendimin e tyre, pas dyshimeve se ndaj dy të rinjve shqiptarë u përdor forcë fizike e tepruar gjatë ngjarjes së 7 tetorit në kryeqytetin e Maqedonisë së Veriut.

Vendimi u mor pasi Kontrolli i brendshëm shqyrtoi incizimet dhe dëshmitë dhe kreu kontrollet përkatëse. Sipas këtij verifikimi, në veprimet e policëve janë konstatuar parregullsi të rënda.

"Si zëvendësministër i Punëve të Brendshme, qëndrimi im është i prerë: përdorimi i forcës është i papranueshëm dhe çdo shkelje e konstatuar kërkon përgjegjësi", deklaroi Iseni. Ai theksoi se uniforma policore nënkupton përgjegjësi për mbrojtjen e qytetarëve dhe se çdo keqpërdorim i saj cenon dinjitetin e tyre, besimin te policia dhe autoritetin e shtetit.

Sipas zëvendësministrit, suspendimi nuk e mbyll çështjen. Institucionet kompetente po vazhdojnë procedurat për dokumentimin e plotë të rastit dhe për përcaktimin e përgjegjësisë eventuale të policëve, e cila ende nuk është përcaktuar. "As uniforma, as funksioni dhe as përkatësia nuk e përjashtojnë askënd nga zbatimi i ligjit", tha Iseni, duke shtuar se qytetarët meritojnë siguri, dinjitet dhe një polici që e ushtron autoritetin me profesionalizëm.