Dy tonë mish i pasigurt në Radovish, proshuta shitej pa leje edhe në rrjetet sociale

Rreth dy tonë mish i freskët dhe i ngrirë, i shpallur i pasigurt për konsum, si dhe produkte të tjera mishi, do të shkatërrohen në deponinë Drislla pas kontrolleve të jashtëzakonshme që Agjencia për Ushqim dhe Veterinari (AUV) zhvilloi dje në Radovish.

Inspektorët e Agjencisë kontrolluan objektet e shitjes me pakicë të mishit dhe të përpunimeve të tij në territorin e Komunës së Radovishit. Në të njëjtën ditë, ata trokitën edhe te një person fizik në fshatin Pepelishte të Negotinës, i cili prodhonte produkte të tymosura mishi dhe kërcëllitje derri dhe i shiste përmes rrjeteve sociale. Sipas Agjencisë, inspektimi konfirmoi se ai nuk kishte autorizim për këtë veprimtari, ndërsa produktet ishin përpunuar dhe ruajtur në kushte johigjienike.

Përveç sasisë së madhe të mishit, Agjencia konfiskoi edhe 50 kilogramë produkte mishi, mes tyre mish të pjekur, kulen dhe proshutë të tymosur. Sipas AUV-së, mallrat e sekuestruara "nuk kishin deklaratë për origjinën dhe ishin ruajtur e përpunuar në kushte të papërshtatshme dhe johigjienike, gjë që paraqet rrezik serioz për sigurinë ushqimore dhe shëndetin e konsumatorëve".

Aksioni vjen pak ditë pas një tjetri në Strugë dhe Ohër, ku në dy mishtore Agjencia konfiskoi dhe asgjësoi 1.000 kilogramë lukth pule dhe 55 kilogramë përgatitje mishi që e përmbanin këtë produkt, importi dhe përdorimi i të cilit për konsum njerëzor janë të ndaluar. Agjencia ka njoftuar se kontrollet do të vazhdojnë, me synim mbrojtjen e shëndetit të qytetarëve dhe parandalimin e shitjes së ushqimeve të pasigurta.