BE-ja për Mlladiqin: Kriminel lufte i dënuar, glorifikimi i tij s'ka vend në Evropë

Bashkimi Evropian e ka quajtur Ratko Mlladiqin "një kriminel lufte i dënuar" dhe ka paralajmëruar se çdo përpjekje për ta kthyer figurën e tij në hero përplaset me themelet e projektit evropian.

Në deklaratën e Shërbimit Evropian për Veprim të Jashtëm thuhet: "Ratko Mlladiq ishte një kriminel lufte i dënuar, i cili kishte kryer krime lufte, gjenocid dhe krime kundër njerëzimit". Në të njëjtin reagim, BE-ja shprehu solidaritet me viktimat, me të mbijetuarit dhe me familjet e tyre.

Paralajmërimi i Brukselit është i drejtpërdrejtë: "Çdo glorifikim i kriminelëve të luftës, mohimi i gjenocidit dhe revizionizmi bien ndesh me vlerat më themelore evropiane dhe nuk kanë vend në BE apo në vendet kandidate", theksohet në deklaratë. Mesazhi prek njëkohësisht anëtarët e bllokut dhe shtetet që aspirojnë anëtarësimin.

Mlladiqi, ish-komandant i Ushtrisë së Republikës Serbe, vdiq teksa po vuante dënimin me burgim të përjetshëm. Në vitin 2017, Tribunali Ndërkombëtar Penal për ish-Jugosllavinë e shpalli fajtor për rolin e tij në krimet e kryera gjatë luftës në Bosnjë dhe Hercegovinë, përfshirë gjenocidin në Srebrenicë.

Konfliktet e armatosura të viteve '90 në Ballkanin Perëndimor, BE-ja i cilësoi si ndër momentet më të errëta të historisë së kohëve të fundit të Evropës. Sipas Brukselit, pajtimi dhe marrëdhëniet e mira fqinjësore mbeten thelbësore për ndërtimin e një të ardhmeje të përbashkët në rajon.

Bashkimi Evropian ka theksuar gjithashtu se do të vazhdojë t'i mbështesë vendet e rajonit në përpjekjet për pajtim, stabilitet dhe zgjidhjen e mosmarrëveshjeve të lidhura me trashëgiminë e konflikteve të së kaluarës.