Zjarr në mesnatë në Bronx: vdes një adoleshent, katër të tjerë në gjendje kritike

Një djalë adoleshent ka humbur jetën dhe katër persona të tjerë janë në gjendje kritike pas një zjarri që përfshiu gjatë natës një pjesë të një pallati banimi në Bronx të Nju Jorkut.

Ekipet e emergjencës u thirrën pak para orës 1 të mëngjesit në kompleksin e banimit Patterson Houses, në Morris Avenue, në lagjen Mott Haven. Zjarri kishte nisur në katin e njëmbëdhjetë të ndërtesës.

Nga flakët u nxorën pesë të plagosur: dy të rritur dhe tre djem. Të gjithë u dërguan me urgjencë në spitale të ndryshme të zonës. Sipas policisë, njëri prej tre djemve nuk i mbijetoi plagëve, ndërsa katër viktimat e tjera, dy të rritur dhe dy djem, po trajtohen për lëndime kritike.

Zjarrfikësve iu desh afro një orë punë për ta vënë zjarrin nën kontroll. Në ndërtesë u dërguan edhe ekipe të specializuara për materiale të rrezikshme, për shkak të pranisë së një baterie litium-jon. Shkaku i zjarrit mbetet nën hetim.