Sulm me thikë te ambasada izraelite në Beograd, Serbia ngre alarmin e kuq për terror

Natën e së mërkurës, para ambasadës së Izraelit në Beograd, një sulmues i armatosur me thika u turr kundër policit që ruante godinën. Roja u plagos lehtë, por arriti të qëllonte dhe ta vriste sulmuesin. Sipas ministrit të Brendshëm të Serbisë, Ivica Daçiq, polici veproi në vetëmbrojtje.

Daçiq e përshkroi autorin si "të mitur". Sipas tij, i riu ishte nën vëzhgimin e agjencive të sigurisë si mbështetës i organizatës terroriste "Shteti Islamik" (IS) dhe besohet se vinte nga Shabaci, qytet në perëndim të Serbisë. Ministri tha se ai "mbante flamurin e zi në mbështetje të 'Shtetit Islamik' në Instagramin e tij" dhe se gjatë sulmit kundër rojës bërtiti "Allahu Akbar" (Zoti është i madh, në arabisht).

Policia serbe po e trajton ngjarjen si sulm terrorist. Niveli i kërcënimit nga terrorizmi është ngritur në shkallën më të lartë, "alarm i kuq". "Kjo nënkupton kontrolle më të rrepta sigurie dhe prani të shtuar policore në vende të ndjeshme, përfshirë objektet e infrastrukturës dhe vendet ku mblidhen turma të mëdha", deklaroi Daçiq.

Ministria e Jashtme e Izraelit konfirmoi më vonë një "tentativë për sulm terrorist" pranë ambasadës së saj në Beograd. Ajo bëri të ditur se asnjë nga punonjësit e përfaqësisë nuk u lëndua dhe se rasti është nën hetim.

Sulmi ndodhi vetëm pak ditë pas zgjedhjeve të parakohshme parlamentare në Serbi dhe një ditë pasi Izraeli mbajti votimin për parlamentin e vet, ku ende nuk duket një rezultat i qartë.

Nuk është hera e parë që kjo ambasadë bëhet shënjestër. Në qershor të vitit 2024, një sulmues i armatosur me hark plagosi rëndë një polic serb që ruante të njëjtën godinë, para se të qëllohej për vdekje nga policia. Ai u identifikua si një 25-vjeçar i konvertuar në islam, nga një fshat afër kryeqytetit, i cili ishte radikalizuar.