Zjarr jashtë kontrollit në malin e Tërbunit, flakët përpijnë pyjet dhe një banesë në Pukë

Mali i Tërbunit në Pukë po digjet dhe zjarri nuk po ndalet. Flakët kanë përfshirë sipërfaqe të mëdha pyjore dhe vijojnë të përhapen me shpejtësi, ndërsa situata në terren përshkruhet si jashtë kontrollit.

Në lagjen Pezhve, zjarri ka kapur një banesë të braktisur, në pronësi të Ali Bajramit. Pak më tej, vatra po zgjerohet mbi pyje të tëra me pishë të zezë, një bimësi që e ushqen shpejt zjarrin dhe që i ka rritur ndjeshëm përmasat vatrës.

Problemi kryesor mbetet terreni. I thepisur dhe i vështirë për t'u aksesuar, ai e bën të pamundur ndërhyrjen e mjeteve zjarrfikëse. Zjarrfikësit e angazhuar në përballje me flakët po punojnë me mjete rrethanore, duke u përpjekur të frenojnë përparimin e frontit të zjarrit.

Situata mbetet kritike ndërsa flakët avancojnë në masivin pyjor të Tërbunit. Autoritetet po monitorojnë zhvillimet dhe po vlerësojnë mundësitë për ndërhyrje në zonat më të prekura. Nuk raportohet ende për persona të lënduar.