Vrasja me silenciator e Viktor Bardhit: kontrolle në pesë banesa me vendim gjykate

Pesë banesa janë kontrolluar nga forcat e policisë në kuadër të hetimeve për vrasjen e Viktor Bardhit, i cili u qëllua për vdekje ndërsa ndodhej brenda automjetit të tij.

Kontrollet u kryen me vendim të Gjykatës së Lezhës dhe përfshinë banesa të pjesëtarëve të familjes Reçi, si dhe të personave të afërm apo të njohur të tyre. Objektivi kryesor i aksionit ishte gjetja e provave materiale, e mjeteve apo e sendeve të tjera komprometuese që mund të lidhen me ekzekutimin e viktimës. Në asnjë moment familja Reçi nuk cilësohet si e dyshuar për ngjarjen.

Sipas të dhënave të hetimit, autorët e vrasjes janë persona ende të paidentifikuar dhe përdorën një armë zjarri të llojit pistoletë me silenciator. Deri tani nuk raportohet për ndalime apo arrestime.

Grupi hetimor vijon punën në terren për sekuestrimin e çdo të dhëne dhe për analizimin e të gjitha pistave të mundshme, duke përfshirë përplasjet e mëparshme apo konfliktet mes palëve që mund të lidhen me ngjarjen.