Vdes nën 47 gradë në Luginën e Vdekjes, turisti francez nuk arriti as dy kilometra

Nën një temperaturë që arrinte 47 gradë Celsius, një turist francez humbi jetën në Luginën e Vdekjes, në Kaliforni të Shteteve të Bashkuara. Viktima është Pierre Michel Formosa, 68 vjeç, i shpallur i vdekur në vendngjarje, sipas shërbimit të parqeve kombëtare, i cili e bëri publike ngjarjen ditën e premte.

Gjithçka nisi më 17 gusht, kur automjeti që drejtonte Formosa mbeti i ngulur në baltë. Bashkë me të ishte edhe një burrë tjetër, gjithashtu francez. Të dy vendosën ta braktisnin veturën dhe të ecnin për të gjetur ndihmë, por Formosa nuk arriti të vazhdonte më tej se dy kilometra.

Shoqëruesi i tij vazhdoi rrugën në këmbë derisa ndeshi një drejtues automjeti, i cili njoftoi autoritetet. Një ekip shpëtimtarësh nisi kërkimet për Formosan, të cilin e gjeti pa jetë.

"Ky është një kujtim rrëqethës se sa shpejt kushtet mund të bëhen të rrezikshme këtu", deklaroi drejtori i parkut të Luginës së Vdekjes, Mike Reynolds. Ai e përshkroi zonën si "një vend të jashtëzakonshëm", por paralajmëroi se "nxehtësia, distancat dhe izolimi mund të jenë të rrezikshme".

Lugina e Vdekjes, e vendosur mbi 300 kilometra në verilindje të Los Anxhelosit, merr viktima çdo vit, përkundër paralajmërimeve të përsëritura të autoriteteve të parkut, të cilat këshillojnë përgatitje të mirë të udhëtimit para se dikush të futet në një mjedis kaq armiqësor.