ReklamëHapësirë reklame
ReklamëHapësirë reklame
Reklamë
Pas vrasjes së 49-vjeçares në Vitomiricë, Kryeprokurori i Shtetit ka nisur procedurë disiplinore ndaj kryeprokurores së Pejës dhe një prokuroreje. Në Kuvend dhe në rrjete sociale, zërat politikë kërkojnë më shumë: hetim penal për zyrtarët.
Kryeprokurori i Shtetit, Zejnullah Gashi, ka nisur procedurë disiplinore dhe ka rekomanduar suspendimin e kryeprokurores së Prokurorisë Themelore në Pejë, Lumturije Vuçetaj, dhe të prokurores Arlinda Nallbani Gacaferri. Masa vjen pas vrasjes së Arlinda Zekajt, 49-vjeçares që u vra më 25 tetor në Vitomiricë të Pejës, një rast që ka vënë në pikëpyetje mënyrën se si institucionet e drejtësisë u përgjigjën raportimeve dhe kërkesave të saj për mbrojtje.
"Po e konfirmoj", tha shkurt Gashi, i pyetur për vendimin.
Rekomandimi do të shqyrtohet në mbledhjen e Këshillit Prokurorial të Kosovës (KPK), të cilën e ka thirrur vetë kryeprokurori Gashi. Procedurat lidhen me gjetjet e Zyrës së Kryeprokurorit të Shtetit për veprime dhe mosveprime të dyshuara në trajtimin e rastit. Mbetet që mekanizmat kompetentë të përcaktojnë nëse dy zyrtaret mbajnë përgjegjësi; deri tani nuk ka asnjë vendim përfundimtar ndaj tyre.
Për një pjesë të skenës politike, masat disiplinore nuk mjaftojnë. Në seancën e Kuvendit të Kosovës, deputeti i Lëvizjes Vetëvendosje (LVV), Artan Abrashi, kërkoi hetim të menjëhershëm penal dhe zbardhjen e përgjegjësive institucionale. Ai i bëri thirrje KPK-së dhe Këshillit Gjyqësor të Kosovës (KGJK) që të nxjerrin në dritë vendimet, udhëzimet dhe mosveprimet eventuale të institucioneve dhe të identifikojnë personat përgjegjës.
"Kush e vlerësoi rrezikun? Kush vendosi se ajo ishte e sigurt të qëndronte aty? Pse nuk dha urdhër prokurorja të sigurohej shtëpia? Kanë kaluar tri ditë, KPK-ja dhe KGJK-ja duhet të zbardhin menjëherë çdo vendim, udhëzim dhe mosveprim. Të identifikohen përgjegjësit dhe të nisin procedurat përkatëse. Nuk mjafton masa disiplinore. Duhet hetim penal sa më parë dhe asnjë minutë më shumë. E mbështesim protestën", tha Abrashi.
Deputeti ngriti edhe akuza konkrete për zinxhirin e vendimeve para vrasjes. Sipas tij, Arlinda Zekaj kishte denoncuar një kërcënim me vrasje, por Prokuroria nuk veproi si duhej dhe personi i denoncuar u trajtua si dëshmitar. Abrashi kritikoi gjithashtu Gjykatën Themelore për një urdhër mbrojtjeje që, sipas tij, lejonte afrimin deri në dy metra brenda shtëpisë. Ai pohoi se avokatja e viktimës kishte paralajmëruar për rrezikun dhe kishte kërkuar hetim disiplinor, por Kryeprokuroria e Pejës e refuzoi kërkesën.
"Pse Prokuroria nuk veproi ndaj tij kur Arlinda e denoncoi për kërcënim me vrasje? Kush vendosi ta trajtonte si dëshmitar? Me çfarë arsyetimi? Kush i kishte duart e lira të kërcënonte dhe kush ia garantonte këtë paprekshmëri? Gjykata Themelore, në pjesën e saj, nxori një urdhër mbrojtjeje që lejonte afrimin deri në dy metra brenda shtëpisë. Dy metra? Çfarë mbrojtjeje është kjo? Një grua e kërcënuar nga dy burra detyrohet të jetojë dy metra larg njërit prej të cilëve kërkonte mbrojtje dhe asnjë metër prej tjetrit. Kjo është mizori dhe jo drejtësi. Avokatja e kishte paralajmëruar për rrezikun dhe kishte kërkuar hetim disiplinor. Kryeprokuroria e Pejës e refuzoi kërkesën. Bëhet fjalë për dy burra me plot vepra penale", deklaroi ai.
Të njëjtën kërkesë e ngriti edhe ish-presidentja e Kosovës dhe deputetja e LDK-së, Vjosa Osmani. Në një postim në Facebook, ajo kritikoi institucionet për trajtimin e rastit dhe theksoi se shkarkimet dhe dorëheqjet nuk mjaftojnë për të adresuar dështimet në mbrojtjen e viktimës. "SHTETI E LA NË DUART E VDEKJES", shkroi Osmani.
Sipas saj, përgjegjësia nuk duhet të mbetet te masat administrative. "Për çdo zyrtar që refuzoi ta mbronte, duhet të ketë edhe përgjegjësi penale", deklaroi ajo, duke e mbyllur mesazhin me fjalët: "DREJTËSI. PËRGJEGJËSI. BURG!"
Ndërkohë, edhe policia është nën lupë. Inspektorati Policor i Kosovës (IPK) ka nisur veprime hetimore dhe verifikuese për mënyrën se si Policia e Kosovës i trajtoi raportimet e Arlinda Zekajt. Me autorizimin e Prokurorisë së Shtetit, IPK do të shqyrtojë komunikimin e zyrtarëve policorë me viktimën, kohën e reagimit dhe veprimet apo mosveprimet eventuale. Qëllimi, sipas IPK-së, është të vlerësohet nëse zyrtarët vepruan në përputhje me procedurat dhe detyrimet ligjore dhe të identifikohen përgjegjësitë individuale dhe institucionale.
Zemërimi publik u shtua pas publikimit të audio-incizimeve në të cilat Arlinda dëgjohet duke kërkuar ndihmë nga policia. Në njërin prej tyre, ajo i drejtohet një zyrtari me fjalët "Faruk, jam lodh, të lutem", ndërsa në komunikim dëgjohet edhe shprehja "nuk të pranoj më". Sipas raportimeve në media, tri ditë para vrasjes ajo u kishte kërkuar institucioneve ndërhyrje urgjente për mbrojtjen e saj.
Identiteti i autorit të vrasjes dhe statusi i tij ligjor nuk janë bërë publikë. Hapi i radhës institucional pritet të jetë mbledhja e KPK-së, ku do të vendoset për rekomandimin e suspendimit të dy prokuroreve.
Një burrë u soll me autoambulancë në QKMF-në e Skenderajt mbrëmjen e së mërkurës, por mjeku vetëm mund të konstatonte vdekjen. Policia ka nisur hetimet, ndërsa shkaku i vdekjes do të sqarohet nga obduksioni.
