"Sikur të mundja, do t'i ndërprisja menjëherë marrëdhëniet": ministri boshnjak tërheq stafin nga Beogradi

Punët konsullore të Ambasadës së Bosnjë e Hercegovinës në Beograd do të zhvendosen në Zagreb dhe Podgoricë. Ky është hapi konkret që njoftoi nga Sarajeva ministri i Punëve të Jashtme i BeH-së, Elmedin Konakoviq, i cili tha se do të tërheqë të gjithë personelin e ambasadës në kryeqytetin serb, me përjashtim të ambasadorit dhe konsullit, për t'i ulur marrëdhëniet me Serbinë "në minimumin e mundshëm".

Arsyeja, sipas tij, është sjellja e shtetit serb pas vdekjes së Ratko Mlladiqit, kriminel lufte i dënuar dhe ish-komandant i Ushtrisë së Republikës Sërpska.

"Sikur të mundja, do t'i ndërprisja menjëherë sot marrëdhëniet diplomatike me Serbinë. Ajo që mundem: do të punoj që marrëdhëniet t'i zvogëlojmë në minimumin e mundshëm. Do ta kufizoj, do ta zvogëloj çdo komunikim me ta. Do t'i tërheqim të gjithë njerëzit që mund t'i tërheqim, punët konsullore do t'i transferojmë në Zagreb dhe Podgoricë", deklaroi Konakoviqi në konferencën për gazetarë në Sarajevë.

Ministri sqaroi se nuk ka kompetencë t'i tërheqë ambasadorin dhe konsullin, sepse ata emërohen nga Kryesia e shtetit. Detyrat e personelit të tërhequr do të kryhen nga të punësuarit në ambasadat e BeH-së në Mal të Zi dhe Kroaci.

Paralelisht, Konakoviqi njoftoi një ofensivë diplomatike me nota dhe letra drejtuar adresave ndërkombëtare. "Ne kemi bërë sot disa drafte, po dërgojmë letra me radhë, me mesazhe të ndryshme. Së pari e pyes publikisht BE-në: A i respektoni vërtet parimet tuaja? A e mbroni atë që na keni detyruar ta ndjekim? Kjo është çështje parësore e politikës së sigurisë", tha ai. Sipas Konakoviqit, Bashkimi Evropian "duhet të tregojë nëse do ta tolerojë atë që kurrë nuk do të tolerohej brenda Unionit", ndërsa letra për vendet anëtare të Organizatës së Konferencës Islamike (OKI) "do ta ketë specifikën e vet". Ai paralajmëroi edhe shumë biseda telefonike dhe mundësisht disa vizita, duke e cilësuar këtë si çështje parësore për Bosnjë e Hercegovinën.

Ministri e quajti ditën "depresive dhe të vështirë" dhe si shkak të mbajtjes së konferencës për gazetarë përmendi "varrimin e kriminelit të luftës dhe sjelljen e pushtetit në Serbi, para së gjithash të Aleksandar Vuçiqit dhe bashkëpunëtorëve të tij".

Sipas rrëfimit të tij, krimineli i luftës "u prit me nderimet më të larta ushtarake dhe shtetërore", avioni i Qeverisë së Serbisë shkoi ta merrte trupin e tij në Hagë dhe atë e pritën rreshtime ushtarësh. "Pamë që në komemoracion dhe në varrim u shfaq një numër i madh zyrtarësh të Serbisë, nuk ishte Vuçiqi sepse u soll si frikacak, duke pasur frikë ndoshta nga sanksionet personale", tha Konakoviqi.

Kulmi i lartësimit të një personi të gjykuar për krime lufte, sipas tij, ndodhi mbrëmjen e kaluar në ndeshjen mes Cërvena Zvezdës dhe Partizanit, me mesazhin "Drejt Potoçarëve", çka ai e cilësoi si "alarmi i fundit".