Përplasje e fortë me furgonin e pasagjerëve në Gumenicë, gjashtë të lënduar

Gjashtë persona kanë mbetur të lënduar mesditën e sotme pas një përplasjeje të fortë mes një automjeti dhe një furgoni që transportonte pasagjerë, në fshatin Gumenicë, brenda territorit të bashkisë Selenicë.

Mjetet e ndihmës së shpejtë mbërritën në vendngjarje menjëherë pas njoftimit. Të lënduarit po transportohen me autoambulanca drejt Spitalit Rajonal të Vlorës, ku ekipet e urgjencës po kryejnë ekzaminimet dhe po japin trajtimin e nevojshëm mjekësor. Gjendja e tyre shëndetësore nuk është bërë ende e ditur.

Në vendin e ngjarjes kanë shkuar edhe shërbimet e Policisë, të cilat kanë bllokuar perimetrin e aksidentit. Ekspertët po punojnë për dokumentimin e plotë të ngjarjes dhe për zbardhjen e rrethanave e shkaqeve që çuan në përplasjen e dy mjeteve.