Pejë: denoncon dhunën e burrit dhe kanosjen e vjehrrit, policia gjen 252 fishekë

Një pistoletë, dy karikatorë dhe 252 fishekë. Kaq gjeti policia në shtëpinë e dy burrave të arrestuar në Pejë, pasi një grua denoncoi se bashkëshorti i saj e kishte dhunuar fizikisht dhe psikologjikisht në vazhdimësi, ndërsa vjehrri e kishte kanosur.

Sipas raportit 24-orësh të Policisë së Kosovës, gruaja e paraqiti rastin më 31 tetor, rreth orës 13:00. Policia e ka regjistruar ngjarjen si dhunë në familje, kanosje dhe armëmbajtje pa leje.

Me vendim të prokurorit, policët bastisën shtëpinë e të dyshuarve. Krahas armës dhe municionit, gjatë kontrollit u sekuestrua edhe një leje valide për armë.

Të dy burrat, bashkëshorti dhe vjehrri, u arrestuan dhe u intervistuan. "Dy të dyshuarit janë arrestuar dhe pas intervistimit me vendim të prokurorit njëri nga të dyshuarit është dërguar në mbajtje, ndërsa tjetri është liruar në procedurë të rregullt", thuhet në raportin e Policisë. Rasti ndaj të dyshuarit të liruar do të vazhdojë në procedurë të rregullt.