OVL e UÇK-së thërret protestë gjithëpopullore: nesër në orën 12:00 në sheshin "Skënderbeu"

Sheshi "Skënderbeu" në Prishtinë është caktuar si vendi i një proteste gjithëpopullore nesër në orën 12:00. Thirrjen e bëri Organizata e Veteranëve të Luftës së Ushtrisë Çlirimtare të Kosovës (OVL e UÇK-së), pas dënimit të ish-krerëve të UÇK-së nga Dhomat e Specializuara në Hagë.

Vendimi për protestë u merr në një takim të mbajtur gjatë ditës me këshillin drejtues të organizatave të dala nga lufta, njoftoi Gazmend Syla nga OVL e UÇK-së.

Syla e lidhi reagimin drejtpërdrejt me zhvillimet e fundit në procesin gjyqësor ndaj drejtuesve të UÇK-së, të cilat, sipas tij, tentuan të vendosnin në një balancë luftën e UÇK-së me atë që ka ndodhur në vitet 1998-1999.

"Dje dhe sot u ul lufta jonë për çlirim dhe u provua të bëhet një balancë mes asaj që ka ndodhur në luftën tonë në vitet ’98-’99. UÇK-ja nuk është kurrë ndërmarrje kriminale, kjo ishte rezistenca në kuptimin tonë përballë dëbimit, masakrave dhe e vetmja përgjigje e një kombi që ishte dënuar me zhdukje. Asnjë vendim nuk mund ta njollosë luftën tonë çlirimtare apo të barazojë ata që luftuan për liri. Që nga fillimi e kemi quajtur këtë gjykatë politike dhe procesin të padrejtë, gjë që sipas nesh u dëshmua edhe dje", deklaroi Syla.

Përveç protestës, organizatat e dala nga lufta synojnë hapa institucionalë e politikë. Syla paralajmëroi krijimin e një këshilli koordinues kombëtar dhe të një platforme që do të shtrihej përtej Kosovës.

"Kësaj padrejtësie që iu bë drejtuesve të luftës së UÇK-së do t’i përgjigjemi me një iniciativë për krijimin e një këshilli koordinues kombëtar dhe të një platforme ku do të përfshihen edhe Shqipëria, por edhe shqiptarët e tjerë që jetojnë në viset e tjera, qoftë Mali i Zi, qoftë Lugina e Preshevës, por edhe nga mërgata jonë. Po ashtu do të kërkojmë krijimin e një strategjie kundërshtuese ndaj këtij vendimi deri në përfundim të procesit të apelit, ku kërkojmë përfshirjen e institucioneve tona, partive parlamentare, shoqërisë civile, institucioneve të tjera të cilat do të mund të kontribuonin në këtë drejtim", tha ai.

Kalendari i veteranëve nis më parë. Në orën 16:30, OVL e UÇK-së bashkë me disa shoqata të familjeve të dëshmorëve dhe shoqatën e invalidëve do të prezantojnë platformën dhe do t'i bashkohen protestës së thirrur nga studentët.

"Po ashtu t’ju bëjmë me dije se organizatat e dala nga lufta sot në takimin që mbajtëm pak më herët me këshillin drejtues morëm vendim që të thërrasim protestë gjithëpopullore nesër në orën 12:00 në sheshin Skënderbeu. Po ashtu në orën 16:30 sot, OVL e UÇK-së së bashku me disa shoqata të tjera të familjeve të dëshmorëve dhe shoqatën e invalidëve do të bëjmë prezantimin e kësaj platforme që e fola më herët, ku ju ftojmë që të jeni prezentë edhe ju, pra do t’i bashkangjitemi protestës dhe thirrjes nga studentët që janë sot, do të jemi edhe ne bashkë me ta në orën 16:30", tha Syla.