Oqeanet nuk kanë qenë kurrë kaq të nxehtë: 21,1 gradë, rekord që sjell përmbytje dhe stuhi

Oqeanet e botës nuk kanë qenë kurrë aq të nxehtë sa të shtunën. Temperatura mesatare e sipërfaqes së detit arriti 21,1 gradë Celsius, shifra më e lartë e regjistruar ndonjëherë, sipas të dhënave më të fundit të publikuara nga gazeta britanike The Guardian.

Nxehtësia në rritje e oqeaneve konsiderohet një nga treguesit më të fortë të krizës klimatike. Mbi 90 për qind e nxehtësisë që mbahet nga dioksidi i karbonit i krijuar nga djegia e lëndëve djegëse fosile përfundon pikërisht në oqeane.

Pasojat nuk mbeten nën ujë. Detet më të ngrohta ndihmojnë në ngritjen e nivelit të detit, pasi uji zgjerohet kur nxehet, duke rritur rrezikun e përmbytjeve për komunitetet bregdetare dhe për shtetet ishullore me lartësi të ulët. Njëkohësisht, temperaturat më të larta ushqejnë dukuritë ekstreme të motit: detet e ngrohta i japin atmosferës më shumë energji dhe avull uji, çka prodhon reshje dhe stuhi më intensive.

Shkencëtarët paralajmërojnë se ngrohja e oqeaneve nxit edhe valët e nxehta detare, të cilat shkatërrojnë jetën detare dhe rrezikojnë ekzistencën e njerëzve në zonat bregdetare. Stuhitë gjithnjë e më të fuqishme dhe rritja e nivelit të detit kërcënojnë miliarda njerëz.

Vera në hemisferën veriore u shënua tashmë nga valë rekord të të nxehtit, thatësira dhe zjarre pyjore në Evropë e në Amerikën e Veriut, si dhe nga reshje të dendura dhe tajfune në Azi.

Rritja e temperaturës së oqeaneve po përforcohet edhe nga fenomeni El Nino, i cili po zhvillohet me shpejtësi dhe pritet të jetë më intensivi i paktën në një shekull.