"Nuk shitet Shqipëria!": Dita e 98-të, marshim masiv bllokon bulevardin në Tiranë

Bulevardi "Dëshmorët e Kombit" u mbush krah për krah. Sapo përfunduan fjalimet kryesore nga platforma e ngritur përpara godinës së ekzekutivit, dita e 98-të e qëndresës popullore kaloi në një fazë të re përshkallëzimi: mijëra qytetarë nisën një marshim masiv që bllokoi plotësisht aksin qendror të kryeqytetit.

Në ballë të kolonës spikatën banderolat me mesazhin "Shqipëria nuk është në shitje", ndërsa nga turma jehonte parulla që i dha edhe tonin ditës: "Nuk shitet Shqipëria! Shitet qeveria!". Thirrjet për dorëheqjen e menjëhershme të kryeministrit Edi Rama u përsëritën vazhdimisht gjatë ecjes.

Parullat e mëdha në duart e protestuesve nuk i drejtoheshin vetëm faktorit qeveritar, por edhe atij ndërkombëtar. Denoncimet për kapjen e shtetit, për shitjen e pasurive kombëtare dhe për korrupsionin u shoqëruan me brohoritje të pandërprera nga turma në lëvizje.

Energjia e shfaqur në rrugë pas 98 ditësh protestë e pandërprerë lexohet si paralajmërim i qartë për mazhorancën përpara 8 shtatorit. Atë ditë, në orën 17:00, pritet grumbullim masiv përpara Parlamentit, me qëllim bllokimin e rinisjes së punimeve të Kuvendit.

Marshimi vijoi nën monitorimin e rreptë të forcave të policisë. Protestuesit u shprehën të vendosur të mos e braktisin rrugën.