Nderimet për Mlladiqin në Beograd, Londra thërret diplomatin serb në ministri

Varrimi i Ratko Mlladiqit, i shpallur fajtor nga një tribunal i pavarur i Kombeve të Bashkuara për gjenocid, krime kundër njerëzimit dhe krime lufte, ka prodhuar një reagim të ashpër diplomatik në Londër. Ministria e Punëve të Jashtme e Mbretërisë së Bashkuar ka thirrur ambasadorin serb në Londër pas nderimeve dhe glorifikimit që iu bënë në Beograd ish-komandantit ushtarak.

Takimin e ka kërkuar Emisarja e posaçme për Ballkanin Perëndimor, Karen Pierce, e cila e thirri të Ngarkuarin me Punë të Serbisë për të dënuar përfshirjen e zyrtarëve shtetërorë dhe ushtarakë serbë në varrimin e Mlladiqit.

Reagimin publik e ka bërë Ministri për Evropën, Lord Wood. "Si komandant ushtarak, Mlladiqi ishte përgjegjës për krime që janë ndër më të rëndat e kryera në Evropë që nga Lufta e Dytë Botërore. Ai u shpall fajtor nga një tribunal i pavarur i Kombeve të Bashkuara për gjenocid, krime kundër njerëzimit dhe krime lufte. Mohimi dhe glorifikimi i krimeve të tij përbëjnë një fyerje ndaj së drejtës ndërkombëtare dhe minojnë drejtpërdrejt stabilitetin dhe besimin në rajon", tha ai.

Në deklaratën e tij, Lord Wood iu drejtua edhe familjeve të viktimave: "Mendimet e Qeverisë së Mbretërisë së Bashkuar janë me viktimat e Mlladiqit dhe familjet e tyre. Ata meritojnë respekt, dhembshuri dhe llogaridhënie, e jo përpjekje për të rishkruar një histori të provuar." Sipas tij, "udhëheqësit politikë dhe institucionet publike kanë përgjegjësi të shikojnë drejt së ardhmes, jo së kaluarës, dhe të veprojnë në mënyra që mbështesin pajtimin rajonal, e jo të rihapin plagët e vjetra".

Ministri britanik kujtoi edhe bazën ligjore të vendimit: "Tribunali Penal Ndërkombëtar për ish-Jugosllavinë u themelua nga Këshilli i Sigurimit i Kombeve të Bashkuara dhe Serbia është e detyruar t'i respektojë vendimet e tij." Duke shpjeguar arsyen e thirrjes së diplomatit serb, ai shtoi: "Pikërisht për këtë arsye, sot thirrëm në takim të Ngarkuarin me Punë të Serbisë. Glorifikimi i një krimineli lufte të dënuar minon drejtpërdrejt besimin, nxit përçarjet dhe është i papajtueshëm me procesin e pajtimit në Bosnjë dhe Hercegovinë dhe në rajon."

Deklarata mbyllet me një angazhim politik: "Mbretëria e Bashkuar mbetet fuqimisht e përkushtuar ndaj drejtësisë ndërkombëtare, llogaridhënies dhe pajtimit të qëndrueshëm në të gjithë Ballkanin Perëndimor dhe do të vazhdojë të punojë me partnerët në rajon dhe në nivel ndërkombëtar në mbështetje të paqes, drejtësisë dhe një të ardhmeje të sigurt dhe të begatë për të gjitha komunitetet."

Hapi i Londrës është pritur me miratim edhe në një reagim publik që përshëndet veprimin e Mbretërisë së Bashkuar në dënimin e glorifikimit të gjenocidit dhe të zbardhjes së krimeve të kryera nga Ratko Mlladiqi, me argumentin se nuk mund të ketë pajtim pa të vërtetën, llogaridhënien dhe respektin ndaj viktimave e të mbijetuarve.