Irani kërcënon me gjoba, ndalim dhe konfiskim anijet që shkelin rregullat në Hormuz

Kalimi nëpër Ngushticën e Hormuzit sapo është bërë më i rrezikshëm për transportin detar. Irani paralajmëroi të hënën (24.08.2026) se anijet të cilat shkelin masat e tij të tranzitit në këtë ngushticë mund të përballen me kufizime, duke përfshirë gjoba, ndalim ose konfiskim.

Paralajmërimi u publikua nga Autoriteti i Ngushticës së Gjirit Persik (PGSA), një organ i ri që Irani e ka krijuar me qëllim menaxhimin e ngushticës, në një postim në rrjetin social X.

Sipas PGSA-së, pronarët e ngarkesave duhet t'i referohen një liste të azhurnuar të anijeve që konsiderohen se nuk sillen në përputhje me rregullat për udhëtimet e lidhura me Gjirin Persik. Në atë listë të kufizuar do të shtohen edhe anijet e përfshira në operacione si transferimet nga anije në anije apo transbordimi me mjete lundruese që nuk i respektojnë rregullat.

Autoriteti iranian ka përcaktuar edhe rrugën për të dalë nga lista: anijet që kërkojnë heqjen e emrave të tyre duhet të paraqesin kërkesë me shpjegimet përkatëse te autoritetet detare të Iranit.

Masa i rrit ndjeshëm rreziqet për qiramarrësit dhe pronarët e anijeve, mjetet e të cilëve kalojnë nëpër Hormuz, rrugë ujore kyçe për transportin e lëndëve energjetike në botë.