"Tri për dy": kërcënimi i admiralit Cooper ndërsa Hormuzi është nën goditje

Një anije e vogël, e cila sipas ushtrisë amerikane përdorej nga kontrabandistë të dyshuar të drogës, u hodh në erë të shtunën në Paqësorin lindor. Sipas Komandës Jugore të SHBA-së (Southcom), anija funksiononte si një pikë karburanti lundruese në shërbim të trafikantëve.

Para se mjeti të shkatërrohej, disa persona u nxorën prej tij dhe u morën në kujdes. "Personat që u larguan nga anija janë dorëzuar te autoritetet ekuadoriane", njoftoi Southcom-i në rrjetin X. Nuk është bërë e ditur numri i tyre, as nëse ka pasur të vrarë apo të lënduar në operacion.

Goditja në Paqësor vjen ndërsa fronti detar rreth Iranit mbetet i nxehtë. Forcat amerikane dhe ato iraniane kanë kryer sulme ndaj anijeve në ujërat përreth Iranit, duke rritur tensionet në Ngushticën e Hormuzit.

Komanda Qendrore e SHBA-së (CENTCOM) njoftoi se goditi tri cisterna iraniane, njëra prej tyre pranë ishullit Kharg, pasi Garda Revolucionare Islamike e Iranit lëshoi raketa balistike drejt dy anijeve të Marinës amerikane. Logjikën e përgjigjes e shpjegoi vetë kreu i CENTCOM-it, admirali Brad Cooper: "Nëse qëlloni dy nga anijet tona, do t'ju shkaktojmë kosto edhe më të madhe ekonomike, duke shkatërruar tri nga tuajat".

Nga ana e saj, Garda Revolucionare kërcënoi se do të intensifikojë sulmet ndaj pranisë ushtarake amerikane në rajon. Më pas ajo pretendoi se kishte goditur tri cisterna që lëviznin nëpër "rrugë të paautorizuara", si dhe tri anije të tjera të lidhura me SHBA-në, pretendim që nuk ka konfirmim të pavarur.

Irani ka paralajmëruar gjithashtu anijet të mos lëvizin nëpër korridore të paautorizuara në Hormuz, duke thënë se në të kundërtën do të vihen në shënjestër, një kërcënim që prek një nga arteriet kryesore të tregtisë botërore të naftës.