Gjykatësja federale ndalon administratën Trump të kërcënojë zyrtarët e zgjedhjeve

Vetëm disa ditë para zgjedhjeve të mesmandatit në Shtetet e Bashkuara, gjykatësja federale e distriktit, Trina Thompson, me seli në Kaliforni, nxori të premten në mbrëmje një urdhër të gjerë që e ndalon administratën e presidentit Trump të kërcënojë ose të frikësojë zyrtarët e zgjedhjeve.

Urdhri, prej tetë faqesh, ndalon çdo veprim që mund të "kërcënojë, frikësojë ose detyrojë zyrtarët apo punonjësit e zgjedhjeve në nivel shteti ose vendor, për t'u kërkuar që të ndalin përpunimin e fletëvotimeve të çdo votuesi të regjistruar vetëm mbi bazën se fletëvotimi i përket një individi që, sipas pretendimit të [administratës], nuk ka të drejtë të votojë".

Në arsyetimin e saj, Thompson nuk i kurseu fjalët për institucionet federale. "Në prag të zgjedhjeve, zyrtarë të lartë të Departamentit të Drejtësisë dhe të Departamentit të Sigurisë Kombëtare janë përfshirë në një fushatë për të frikësuar, kërcënuar dhe detyruar zyrtarët dhe punonjësit e shteteve dhe ata vendorë që janë të angazhuar në administrimin e zgjedhjeve të mesmandatit 2026, të cilat janë në vijim", shkroi gjykatësja.

Vendimi vjen pas javësh presioni nga administrata. Departamenti i Drejtësisë u dërgoi kohët e fundit letra zyrtarëve të zgjedhjeve në nivel shteti dhe vendor në të gjithë vendin, duke i paralajmëruar për ndëshkime penale në rast se nuk respektojnë rregullat për ruajtjen e dokumentacionit.

Në të njëjtën kohë, administrata është përpjekur t'u kërkojë shteteve si Kalifornia dhe Uashingtoni që të veçojnë fletëvotimet për të cilat ajo pretendon se mund të jenë hedhur nga persona pa shtetësi amerikane. Këtë javë, një gjykatë apeli vendosi kundër administratës në rastin e Kalifornisë, ndërsa çështja e Uashingtonit mbetet ende e pazgjidhur.

Administrata i paraqet veprimet e saj si mbrojtje e procesit zgjedhor. Gjykatësja, megjithatë, paralajmëroi për pasoja të kundërta: "Megjithëse të paditurit pretendojnë se veprimet e tyre synojnë të ndalin votimin e paligjshëm nga joshtetasit, veprimet e tyre ka të ngjarë të kenë si efekt ndërhyrjen në administrimin e zgjedhjeve dhe privimin nga e drejta e votës të votuesve të ligjshëm", shkroi Thompson.

Urdhri mbetet në fuqi deri më 16 nëntor, gati dy javë pas ditës së zgjedhjeve, duke mbuluar kështu edhe periudhën e numërimit dhe përpunimit të votave.