Nju Jork: Tetë të akuzuar për vjedhjen e milionave dollarëve të dedikuara për përfituesit e SNAP-it

Paratë mbërrinin në kartë dhe zhdukeshin brenda ditës. Sipas prokurorëve të Manhattanit, në disa raste mbajtësit e ligjshëm të kartave të ndihmës ushqimore u përpoqën t'i përdornin ato po atë ditë kur u ishin ngarkuar fondet, por zbuluan se llogaritë e tyre ishin zbrazur tashmë.

Të enjten, Zyra e Prokurorit të Distriktit të Manhattanit ngriti akuza ndaj tetë anëtarëve të një rrjeti që dyshohet se përvetësoi miliona dollarë të destinuar për përfituesit e SNAP, programit amerikan të ndihmës ushqimore. Të pandehurit përballen, ndër të tjera, me akuza për bashkëpunim kriminal, vjedhje dhe vjedhje identiteti.

Po atë pasdite, të tetë u paraqitën para një gjyqtari të Gjykatës Supreme të Shtetit të Nju Jorkut, ku prokurorët e Manhattanit i akuzuan zyrtarisht. Mes tyre janë Belal Hauter, 34 vjeç, të cilin prokuroria e akuzon si drejtues të skemës, si dhe Gregory Fabiani, 46 vjeç, Abdulla Aezah, 35 vjeç, Milton Rios, 53 vjeç, dhe Yvette Rivera, 58 vjeç.

Sipas dokumenteve gjyqësore, të pandehurit përdornin emrat e bizneseve reale ose fiktive për të kryer transaksione me karta të Transferimit Elektronik të Përfitimeve (EBT), mjeti përmes të cilit u shpërndahet ndihma përfituesve. Pas kësaj, numrat e kartave dhe kodet PIN dyshohet se vidheshin, kopjoheshin dhe përdoreshin për të tërhequr fondet e programeve ushqimore.

Ndër provat e paraqitura në gjykatë janë fotografi të pajisjeve me të cilat kryheshin transaksionet, si dhe pamje të anëtarëve të dyshuar të rrjetit duke vepruar në pjesën e pasme të një magazine në Yonkers dhe në disa hotele.

Sipas akuzës, paratë e vjedhura u përdorën për blerjen e disa automjeteve luksoze dhe për dërgimin e dhjetëra mijëra dollarëve në Jemen dhe në vende të tjera.

Të gjithë të pandehurit deklaruan se nuk janë fajtorë. Gjyqtari caktoi për ta lirim me kusht me garanci që varion nga 100 mijë deri në 1 milion dollarë. Seanca e radhës është caktuar për 10 dhjetor.