Dy të vrarë në sulmin amerikan ndaj një anijeje në Paqësor, mbi 200 që nga shtatori

Një video bardhë e zi, me cilësi të dobët, tregon një anije që lëviz mbi ujë. Menjëherë pas saj, një shpërthim i madh. Kjo pamje shoqëroi njoftimin e Komandës Jugore të ushtrisë amerikane (SOUTHCOM), sipas të cilit sulmi i së dielës në Oqeanin Paqësor vrau dy persona.

Në një postim të hënën në rrjetin X, SOUTHCOM tha se objektivi ishte një anije që lëvizte përgjatë rrugëve të njohura të narkotrafikut në Paqësorin Lindor. "Inteligjenca e konfirmuar zbuloi përfshirjen aktive të anijes në narkotrafik", u shpreh komanda, duke shtuar: "Ky operacion është një kujtesë e qartë dhe vendimtare se SOUTHCOM po e çon luftën drejtpërdrejt te kartelet."

Sipas njoftimit, nën drejtimin e komandantit të SOUTHCOM, gjeneralit Francis L. Donovan, Forca e Përbashkët e Detyrës për Hemisferën Perëndimore kreu një goditje vdekjeprurëse kinetike ndaj anijes me profil të ulët.

"Jemi të përkushtuar t'u imponojmë narkoterroristëve një fërkim total sistemik, duke ndërprerë operacionet e tyre, duke çmontuar udhëheqjen e tyre dhe duke eliminuar terrorin e kartelit në të gjithë rajonin", citohet të ketë thënë Donovan.

"Le ta them qartë, nuk do të lejojmë që narkoterroristët të veprojnë me pandëshkueshmëri në Hemisferën Perëndimore, as nuk do të lejojmë që helmi i tyre vdekjeprurës të arrijë në komunitetet amerikane. Ky operacion është një demonstrim i fuqishëm i preçizionit tonë vdekjeprurës, i kapacitetit tonë dërrmues dhe i vendosmërisë sonë absolute për të mbrojtur atdheun amerikan", tha ai.

Sulmi është pjesë e operacionit "Southern Spear", të nisur nga ushtria amerikane në fillim të shtatorit. Presidenti Donald Trump ka argumentuar se Uashingtoni është faktikisht në luftë me kartelet e drogës të Amerikës Latine. Që nga nisja e operacionit, mbi 200 persona janë vrarë në sulme në Paqësorin Lindor dhe në Detin e Karaibeve, sipas një numërimi të agjencisë së lajmeve AFP.

Administrata Trump nuk ka paraqitur prova përfundimtare se anijet e goditura ishin të përfshira në trafikun e drogës. Ekspertë ligjorë dhe organizata të të drejtave të njeriut paralajmërojnë se këto sulme mund të përbëjnë vrasje jashtëgjyqësore.

Në maj, inspektori i përgjithshëm i Pentagonit njoftoi se do të shqyrtojë nëse ushtria ka ndjekur procedurat standarde të përzgjedhjes së objektivave. Ai vlerësim nuk do ta prekë bazën ligjore mbi të cilën po kryhen goditjet.