Drejtori i Policisë, Gazmend Hoxha, jep dorëheqje pas vrasjes së Arlinda Zekajt

Policia e Kosovës mbeti pa drejtorin e saj të përgjithshëm. Gazmend Hoxha dha dorëheqje më 30 tetor, pesë ditë pas vrasjes së Arlinda Zekajt, rast që ka ndezur protesta dhe kërkesa për llogaridhënie nga institucionet.

Vetë Hoxha e përshkroi largimin me pak fjalë. I pyetur nga Radio Evropa e Lirë nëse vendimi i tij lidhet me mënyrën se si institucionet e trajtuan rastin, ai tha se “lidhet me dorëheqje morale”. Pyetjes nëse kjo do të thotë se ndien përgjegjësi për lëshimet institucionale në trajtimin e rastit, ai nuk iu përgjigj.

Më herët gjatë ditës, Zyra e Kryeministrit kishte njoftuar se kryeministri Albin Kurti e kishte pranuar dorëheqjen dhe e kishte liruar Hoxhën nga detyra. Me propozim të ministrit të Punëve të Brendshme, Xhelal Sveçlës, Kurti caktoi Fehmi Hotin ushtrues detyre të drejtorit të përgjithshëm të Policisë së Kosovës.

“Qeveria e Republikës së Kosovës e çmon kontributin dhe angazhimin e z. Hoxha përgjatë mandatit të tij”, thuhej në njoftimin e Qeverisë, e cila nuk dha asnjë arsye për dorëheqjen.

Largimi i kreut të Policisë vjen një ditë pasi u bë e ditur suspendimi i 11 zyrtarëve policorë në lidhje me rastin. Vrasja ka nxjerrë qytetarët në rrugë në Prishtinë dhe në qytete të tjera, ndërsa thirrjet për dorëheqje janë drejtuar edhe ndaj ministrit Sveçla dhe ministres së Drejtësisë, Donika Gërvallës. Të dy kanë mohuar se do të largohen nga postet.

Në një konferencë të përbashkët me Gërvallën, Sveçla bëri të ditur se një raport i dy ministrive, i përpiluar me kërkesë të Kurtit, ka identifikuar 155 raste aktive me rrezikshmëri të lartë për dhunë në familje. “Arlinda kërkoi mbrojtje. Sot përgjegjësia jonë është që të sigurohet që çdo veprim apo mosveprim të hetohet”, tha ai, duke shtuar se të gjitha rastet e tjera të identifikuara do të trajtohen me seriozitetin më të madh.

Para ndërtesës së Qeverisë, protesta vazhdon. Raportohet se familjarët e Arlinda Zekajt, të veshur në zi dhe me lot në sy, janë bashkuar me protestuesit për të kërkuar drejtësi, ndërsa mes alarmeve dhe vërshëllimave janë hedhur mjete tymuese drejt këmbëve të policëve të vendosur para hyrjes. Pranë objektit ka nisur ngritja e një tende, shenjë se protestuesit synojnë të qëndrojnë aty.