Dajti nën flakë, 11 vatra zjarri aktive në Shqipëri: helikopterë dhe Air Tractor në ajër

Mali i Dajtit mbetet fronti kryesor i betejës me flakët. Aty zjarri vijon të jetë aktiv dhe ndërhyrja mbështetet nga Forcat e Armatosura me efektivë, mjete dhe helikopterë, sipas bilancit të Ministrisë së Mbrojtjes për situatën e zjarreve në vend.

Gjatë ditës janë raportuar 20 vatra zjarri. Prej tyre, 11 mbeten aktive, 7 janë nën mbikëqyrje dhe 2 janë shuar. Në operacionet për përballimin e situatës janë angazhuar strukturat vendore dhe Forcat e Armatosura, me kapacitete tokësore dhe ajrore.

Në Kryezi të Kavajës, krahas forcave zjarrfikëse, është vënë në punë edhe një avion Air Tractor. Situatë aktive paraqitet gjithashtu në Dibër, veçanërisht në zonën Lundre-Madhesh të Matit, ndërsa në Lezhë puna vijon në Kalivaç-Zimaj-Kashnjet, me mbështetjen e dy helikopterëve të Forcave të Armatosura.

Në Qarkun e Shkodrës, zjarri Bardhaj-Myselim mbetet aktiv. Në operacion janë angazhuar strukturat vendore, vullnetarët dhe Forcat e Armatosura, përfshirë 2 helikopterë. Aktiv mbetet edhe zjarri në Kulumri të Fushë-Arrëzit, si dhe vatra në Kropisht të Selenicës, në Vokopolë të Poliçanit dhe në zona të tjera.

Nën mbikëqyrje janë disa vatra në Korçë, Elbasan, Durrës, Fier, Kukës dhe Shkodër, ndër to edhe situata në Drizë-Peshtan-Frakull të Fierit. Nuk janë raportuar viktima apo të lënduar.

Agjencia Kombëtare e Mbrojtjes Civile po ndjek pandërprerë situatën në të gjithë territorin, në koordinim të ngushtë me prefekturat, bashkitë dhe strukturat e sistemit të Mbrojtjes Civile. Kapacitetet operacionale mbeten në terren dhe në gatishmëri për të ndërhyrë aty ku situata e kërkon, me prioritet mbrojtjen e jetës, banesave dhe pasurisë së qytetarëve.