Central Park: NYPD publikon pamjet e para të të dyshuarit për përdhunimin me thikë

Policia e Nju Jorkut (NYPD) ka publikuar pamjet e para nga kamerat e mbikëqyrjes të burrit që kërkohet për sulmin e së shtunës në Central Park, ku, sipas zyrtarëve, një grua 39-vjeçare u përdhunua nën kërcënimin e thikës. Në imazhe, i dyshuari shihet duke ecur në një trotuar, i veshur me rroba të errëta dhe me një çantë shpine po ashtu të errët.

Sipas zyrtarëve, sulmi ndodhi rreth orës 21:00 të së shtunës, pranë zonës së Rrugës 66 Lindore dhe Avenysë së Pestë, në Manhatan. Autori e tërhoqi gruan në një pjesë me pemë të parkut dhe e sulmoi me dhunë. Detektivët kanë bërë të ditur se viktima nuk e njihte sulmuesin. Deri tani nuk është raportuar asnjë arrestim.

Rasti nuk është i vetmi. Virginia Maloney, anëtare e Këshillit Bashkiak të Nju Jorkut, tha se sulmi i së shtunës është i dyti ndaj një gruaje në park brenda një jave. Njëkohësisht, policia po kërkon edhe tre burra që, më 18 tetor, sulmuan dhe grabitën një grua tjetër.

Sipas të dhënave të NYPD-së, ky është sulmi seksual i pestë i raportuar në Central Park që nga fillimi i vitit.

Banorët e lagjes presin arrestime në të dyja rastet, ndërsa disa prej tyre kërkojnë më shumë patrulla policie në zonë, sidomos gjatë natës. "Duhet të jesh i sigurt kur ecën në park dhe të shijosh bukurinë e Central Parkut. Është oborri i të gjithëve", tha një grua e lagjes të hënën. "Do të doja të kishte më shumë prani policie në park. Gjatë ditës nuk e shoh të nevojshme, por në mbrëmje mendoj se është."

Një tjetër grua që ndodhej në park e shprehu ndryshe të njëjtin shqetësim: "Natyrisht, askush nuk dëshiron rreth njëqind policë përreth vazhdimisht për t'u siguruar që je i sigurt. Kjo duhet të jetë e mirëqenë."