Budva: E rrëzoi për tokë atentatorin me pistoletë të gatshme dhe priti policinë

Në një lokal në Budva, banori i qytetit bregdetar Ognjen Kažanegra vuri re një të ri me sjellje të dyshimta që sapo kishte hyrë brenda. Nuk priti. Iu drejtua atij, e rrëzoi për tokë dhe nuk e lejoi të nxirrte pistoletën që mbante në xhep. E mbajti të imobilizuar derisa policia e Budvës mbërriti në vendin e ngjarjes dhe e mori në dorëzim të dyshuarin.

Sipas atyre që u konstatuan më pas, arma ishte e karikuar dhe e gatshme për të shtënë. Dyshohet se personi kishte ardhur në lokal me qëllimin të vriste Kažanegrën. Në momentin e incidentit, në lokal ndodheshin edhe disa shokë të tij, sipas dëshmitarëve okularë.

Drejtoria e Policisë e Malit të Zi konfirmoi zyrtarisht se policët e Budvës, pas thirrjes së qytetarëve, morën në dorëzim në një objekt hotelierik një shtetas të huaj për të cilin dyshohet se ndodhej atje me synimin për të kryer një vepër penale të rëndë. "Këtë person e kishin mposhtur dhe e kishin mbajtur më parë qytetarët në objekt, për të cilët dyshohet se kanë qenë shënjestër e atakut, pas së cilës për ngjarjen është njoftuar policia. Zyrtarët policorë te ky person kanë gjetur armë zjarri, pistoletë, pas së cilës është sjellë në ambientet zyrtare të policisë. Në vazhdim është mbledhja e informacioneve dhe marrja e masave e veprimeve të tjera me qëllim konstatimin e të gjitha rrethanave të ngjarjes në koordinim me Prokurorinë Bazë të Shtetit në Kotor", thuhet në komunikatën e Drejtorisë së Policisë.

Nga Drejtoria e Policisë shtojnë se disponojnë identitetin e shtetasit të huaj të dyshuar dhe se aktivitetet e mëtejshme janë në vazhdim, për rezultatin e të cilave opinioni do të njoftohet në kohën e duhur. Në rrugë joformale, nga Drejtoria e Policisë është thënë se atakuesin e kanë identifikuar si Danilo Xhekuliqin (22) nga Kula, por që pritet rezultati i verifikimeve ndërkombëtare përmes kanaleve të Interpolit, për t'u konfirmuar përfundimisht identiteti.

Xhekuliqi kërkohet nga policia malazeze prej fundit të qershorit, për dyshimin se është i lidhur me vrasjen e Darko Veskoviqit, të njohur me nofkën Prika, i cili u likuidua më 22 qershor të këtij viti në një kafene në lagjen beogradase Kumodrazh. Në ditën e fundit të qershorit, Drejtoria e Policisë njoftoi se për vrasjen e Veskoviqit kërkonte Xhekuliqin dhe Nikolas Kovaçin, po ai nga Kula, me dyshimin se fshiheshin në Mal të Zi, dhe u dërgoi mediave fotografinë e Xhekuliqit, bashkë me një apel drejtuar qytetarëve për të ofruar çdo informacion që mund të ndihmonte në gjetjen e tyre.

Të njëjtën ditë, policia bëri të ditur se ishin arrestuar tre banorë të Rozhajës, Enes Nokiqi (45), Haris Mujeviqi (26) dhe Aldin Mujeviqi (34), si edhe një rus, për dyshimin se, pas vrasjes në Beograd, kishin mundësuar hyrjen ilegale të të dyshuarve në Mal të Zi dhe i kishin pajisur me mbështetje logjistike për arratisjen dhe fshehjen. Sipas dyshimeve, tre banorët e Rozhajës i kaluan dy të dyshuarit për vrasjen e Veskoviqit nëpër vijën kufitare mes Serbisë dhe Malit të Zi jashtë pikës zyrtare kufitare, dhe më pas organizuan transportin e tyre nga Rozhaja në Podgoricë.