"Banka e fshehtë" e mafias: 30 arrestime, dyshime për bashkëpunëtorë shqiptarë

Një strukturë financiare e paligjshme, e njohur si "bankë e fshehtë", është në qendër të një operacioni të gjerë kundër mafias që përfshiu Italinë, Spanjën dhe Zvicrën. Bilanci: 30 persona të arrestuar dhe pasuri të sekuestruara me vlerë mbi 21 milionë euro.

Skemën e zbuluan hetuesit e Guardia di Finanza-s italiane. Sipas tyre, kjo strukturë dyshohet se shërbente për të pastruar paratë që vinin nga mashtrimet tatimore, trafiku i drogës dhe ai i armëve. Organizata, thonë hetuesit, kishte lëshuar fatura fiktive në vlerë mbi 110 milionë euro, ndërsa rreth 68 milionë euro dyshohet se u pastruan në nivel ndërkombëtar përmes kriptovalutave.

Një nga arrestimet u krye në Lugano të Zvicrës. Aty u prang një 62-vjeçar me shtetësi italiane, i lindur në Napoli, i cili dyshohet se kishte rol në transferimin e parave dhe në konvertimin e tyre në kriptovaluta. Ai mbahet në paraburgim, në pritje të procedurave të ekstradimit.

Operacioni u koordinua nga autoritetet italiane, me kontrolle që u shtrinë edhe në kantonin Ticino dhe në Spanjë.

Gjurma shqiptare vjen nga gazeta zvicerane laRegione, e cila shkruan se organizata mbështetej nga bashkëpunëtorë kinezë dhe shqiptarë. Gazeta nuk jep asnjë detaj për identitetin e tyre dhe nuk dihet nëse ndonjë shqiptar është mes të arrestuarve.