Rahovec: Inspektorati i Punës ndal punimet në 12 kantiere për shkelje të sigurisë

Dymbëdhjetë kantiere ndërtimi në Rahovec kanë mbetur pa punë pas ndërhyrjes së Inspektoratit Qendror të Punës, i cili ka urdhëruar ndalimin e punimeve për shkak të parregullsive në zbatimin e masave për sigurinë dhe shëndetin në punë.

Sipas Inspektoratit, shkeljet e kërkesave për mbrojtjen e punëtorëve u evidentuan nga inspektorët gjatë kontrolleve në terren në disa kantiere të Komunës së Rahovecit. Ndalimi mbetet në fuqi derisa të eliminohen parregullsitë e konstatuara dhe të përmbushen kërkesat ligjore për sigurinë dhe shëndetin në vendin e punës. Emrat e objekteve dhe të kompanive që i ndërtojnë ato nuk janë bërë publike.

Institucioni paralajmëron se kontrollet nuk mbyllen me kaq. "Inspektorati Qendror i Punës do të vazhdojë inspektimet në terren, me qëllim të parandalimit të rreziqeve dhe krijimit të kushteve të sigurta për punëtorët", thuhet në njoftimin e tij.