101 ditë qëndresë në Tiranë: pas Kryeministrisë, protesta zhvendoset para Kuvendit

Thirrjet "Rama jep dorëheqjen" dhe "Ju erdhi fundi" jehuan mbrëmjen e kaluar në sheshin "Skënderbej" dhe më pas përpara Kryeministrisë, në tubimin e 100-të të protestës së qytetarëve kundër qeverisë. Sot, lëvizja shënon ditën e 101-të, ndërsa protesta zhvendoset para Kuvendit.

Prej më shumë se tre muajsh, qytetarët mblidhen në mënyrë të vazhdueshme në kryeqytet, duke kërkuar largimin e kryeministrit Edi Rama dhe ndryshime politike. Grumbullimet kanë marrë formën e marshimeve në rrugët e Tiranës, të shoqëruara me pankarta dhe thirrje kundër qeverisë.

Në tubimin e mbrëmshëm, protestuesit përsëritën kërkesën për dorëheqjen e Ramës, ndërsa aktivistë dhe qytetarë paralajmëruan përshkallëzim të aksionit opozitar dhe vijim të protestave edhe në ditët në vijim. Një prej protestuesve deklaroi se rezistenca do të hyjë në një nivel tjetër, ndërsa nga tubimi u bënë thirrje për pjesëmarrje edhe më të madhe në protestat e ardhshme.

Për protestën e 101-të, organizatorët dhe aktivistët kanë kërkuar pjesëmarrje masive. Pas grumbullimit në shesh pritet të zhvillohet edhe marshimi në rrugët e kryeqytetit, me të njëjtën kërkesë kryesore që i ka dhënë ton kësaj lëvizjeje prej fillimit: largimin e kryeministrit.