Zveçan, prilli 1999: tre të vrarë, shtatë të rrëmbyer dhe një trup ende i pagjetur

Ishte 29 prilli i vitit 1999 kur, sipas Prokurorisë Speciale të Republikës së Kosovës, njësi të uniformuara të Ushtrisë Jugosllave dhe të policisë serbe rrethuan një fshat në komunën e Zveçanit. Kur operacioni mbaroi, tre banorë civilë ishin vrarë, shtatë të tjerë ishin marrë me vete, shtëpitë ishin djegur dhe pasuria ishte shkatërruar.

Në qendër të kësaj ngjarjeje, prokuroria vendos M.Gj., të cilin e akuzon për veprën penale "Krime lufte kundër popullsisë civile". Sipas aktakuzës, ai ishte komandant i Repartit Policor (përbërja rezervë) në Zveçan dhe mori pjesë në operacion bashkë me pjesëtarë të tjerë të paidentifikuar, të organizuar në formacione të strukturuara.

Fati i të rrëmbyerve u zbulua vetëm pjesërisht. "Trupat e gjashtë (6) prej tyre u gjetën në varrezat e fshatit Suhodoll, ndërsa trupi i viktimës së shtatë (7) ende nuk është gjetur", thuhet në njoftimin e prokurorisë.

Ngjarja e prillit 1999 është vetëm një pjesë e akuzës. Prokuroria pretendon se gjatë viteve 1998 dhe 1999, në bashkëkryerje me pjesëtarë të tjerë të forcave policore serbe dhe nën përgjegjësinë individuale e komanduese, i pandehuri ka kryer vrasje, trajtim çnjerëzor, frikësim, shkatërrim të pasurisë, dëbim masiv dhe spastrim etnik të popullsisë civile.

Rasti tashmë i është dërguar për shqyrtim Gjykatës Themelore në Prishtinë. M.Gj. ndodhet në paraburgim dhe, deri në një vendim të formës së prerë, akuzat ndaj tij mbeten të paprovuara.