Zulfaj nga Sofja: Normalizimi vjen kur Serbia të bëhet shtet normal

"Normalizimi me Serbinë do të vijë kur Serbia të bëhet një vend normal. Mendoj se ende nuk është kështu", tha kryenegociatori i Kosovës me Bashkimin Evropian, Jeton Zulfaj, në forumin "EU Meets the Balkans 5.0" në Sofje.

Zulfaj e ndërtoi argumentin e tij mbi atë që e quajti mungesë të pranimit të përgjegjësisë nga Beogradi. Sipas tij, Serbia nuk ka marrë përgjegjësi për krimet e kryera dhe vazhdon t'i glorifikojë ato.

"Ne kemi një fqinj shumë të vështirë dhe agresiv, i cili nuk ka marrë përgjegjësi për krimet që ka kryer dhe, në vend të kësaj, i glorifikon ato, dhe siç e pamë, tani adhuron një person që ka kryer gjenocid. Pra, kjo është pjesë e problemit në normalizimin e marrëdhënieve me fqinjin tonë. Dialogu ka nisur në vitin 2011, 15 vjet më parë, ndërsa në vitin 2012 Serbia mori statusin e kandidatit dhe më pas, në vitin 2013, hapi negociatat për anëtarësim. Në vitin 2014, ajo zhvilloi konferencën e parë ndërqeveritare pa i normalizuar marrëdhëniet. Normalizimi kërkon përkushtim, por përkushtim ndaj realitetit dhe vlerave të BE-së, të cilës të gjithë duam t'i bashkohemi", deklaroi ai.

Kryenegociatori iu referua edhe bilancit të bisedimeve: dialogut Kosovë-Serbi të nisur në vitin 2011 dhe marrëveshjeve të arritura ndër vite, të cilat, sipas tij, arrijnë numrin rreth 39. Ndër to renditi marrëveshjen e Brukselit të 27 shkurtit 2023 dhe aneksin e dakorduar në Ohër.

Pikërisht atë periudhë Zulfaj e përdori si kthesë në rrëfimin e tij, duke përmendur agresionin në Banjskë dhe sulmin ndaj infrastrukturës kritike në Ibër-Lepenc si prova se, sipas tij, nuk bëhet fjalë për sjelljen e një shteti të angazhuar për normalizim.

"E fundit është ajo e Brukselit e 27 shkurtit 2023, dhe më pas patëm një aneks të asaj marrëveshjeje në Ohër. Pastaj ndodhi një sulm terrorist, një agresion nga Serbia në Banjskë, e më vonë edhe ndaj infrastrukturës sonë kritike në Ibër-Lepenc. Pra, kjo nuk është sjellja e një fqinji që dëshiron normalizimin, por e dikujt që është shumë i përkushtuar ndaj pengimit dhe një rruge agresive. Por rruga jonë drejt BE-së është ajo e sundimit të ligjit dhe drejtësisë, reformave dhe përparimit ekonomik, dhe kjo është rruga që po ndjekim. Dhe në këtë proces, mendoj se është shumë e rëndësishme që Serbia të mos bëhet portë për Kosovën. Ju e dini, Serbia ka 35 kapituj dhe kapitulli i fundit është normalizimi i marrëdhënieve me Kosovën. Pra, ajo mund të vlerësohet për atë që bën në sundimin e ligjit, drejtësi, demokraci, liri dhe mbrojtjen e të drejtave, dhe për të gjitha këto mund të marrë një vlerësim pozitiv nëse i përmbush. Dhe vetëm kapitulli i fundit do të ishte ai ku, duke pasur parasysh qëndrimin e saj agresiv, do të dështonte ta përfundonte", tha Zulfaj.

Në thelb të mesazhit të tij qëndron një kërkesë e qartë drejtuar Brukselit: Serbia të mos shndërrohet në "portë" për rrugën evropiane të Kosovës. Vetë Kosova, tha kryenegociatori, po e ndjek rrugën e sundimit të ligjit, të reformave dhe të përparimit ekonomik.