Zubin Potok: nëntë të dyshuarit për krim lufte mbeten edhe 48 orë në mbajtje

Vendimi për fatin e nëntë serbëve të arrestuar në Zubin Potok, të dyshuar për krim lufte kundër popullsisë civile, u shty edhe për 48 orë. Pas seancës për caktimin e paraburgimit në Gjykatën Themelore në Prishtinë, mbajtja e tyre u zgjat për këtë afat, i cili nis nga momenti i përfundimit të seancës. Kur të skadojë, gjykata pritet të vendosë për masën e mëtejshme.

Të dyshuarit u arrestuan të dielën nga Policia e Kosovës. Sipas deklaratës së përbashkët të policisë dhe prokurorisë, arrestimet u kryen në kuadër të operacionit të quajtur "Dosja 23", ndërsa të dyshuarit identifikohen me inicialet D.D, M.R, M.R, R.R, S.D, S.D, V.L, R.R. dhe D.D. Fillimisht atyre u ishte caktuar masa e ndalimit deri në 48 orë.

Në sallë, mbrojtja u përpoq të rrëzonte pretendimet e kërkesës për paraburgim. Avokatja e njërit prej të arrestuarve tha se në këtë rast mungon individualizimi i veprës dhe se asnjë nga të dyshuarit nuk ka lidhje me të.

"Do të ndalem vetëm te ajo që prokuroria ishte e detyruar ta bënte, por nuk e bëri. Gjithçka është e përgjithshme, siç ka qenë gjithmonë deri tani: ata e bënë këtë, ata e bënë atë, kështu që të gjithë mbrojtësit i ngritëm këto kundërshtime. Të gjithë e kundërshtuam kërkesën për caktimin e paraburgimit dhe kërkuam që ata të mbrohen në liri, e nëse gjykata nuk e pranon këtë, atëherë të caktojë ndonjë masë më të butë, siç është arresti shtëpiak; dikush kërkoi dorëzani, dikush jo, sepse njerëzit nuk kanë as para", deklaroi ajo.

Sipas saj, prokuroria nuk arriti të tregojë rolin konkret të secilit. "Prokuroria rendit disa dëshmitarë, por askund nuk thotë se çfarë ka bërë konkretisht secili nga të dyshuarit, ndërsa ligji thotë qartë se duhet të përshkruhet në detaje se çfarë ka bërë i dyshuari. Kështu që të gjitha këto i theksuam, secili nga kolegët paraqiti shumë argumente. Më duket se ishim në pozitë shumë më të fortë se prokurorja, por e dini si është, do të shohim, nuk mund të themi asgjë paraprakisht", tha ajo.

Avokatja ngriti edhe dy ankesa të tjera. E para: të dyshuarit janë vendosur në qendra të ndryshme paraburgimi dhe avokatët nuk kishin asnjë informacion se ku ndodhen klientët e tyre. E dyta lidhet me një test alkooli, që sipas saj u është bërë të arrestuarve në orën pesë të mëngjesit. "Na zemëroi pak komenti i prokurores, e cila thotë se u kanë bërë testin e alkoolit në orën 5-6 të mëngjesit. Hyjnë në banesë, i arrestojnë dhe u bëjnë testin e alkoolit. Dua të them, ku është logjika këtu? Ndërsa vendimi se janë arrestuar është nga ora 11", tha ajo.

Edhe avokati i një të arrestuari tjetër e cilësoi kërkesën e prokurorisë si të varfër, të pambështetur në fakte dhe pa asnjë provë të vlefshme. "Janë propozuar edhe disa dëshmitarë ku figurojnë vetëm emri dhe mbiemri, nuk ka asnjë fjalë që do të mund të na orientonte se çfarë tregon ajo kërkesë për caktimin e paraburgimit. Kështu që pres që kjo kërkesë të hidhet poshtë dhe që të pandehurve eventualisht t'u caktohet arrest shtëpiak ose ndonjë masë më e butë, si mbikëqyrja policore e të ngjashme", u shpreh ai.