Zubin Potok: Arsenal armësh pranë varreve masive, dyshohet se u përdorën për vrasjen e 23 personave

Toka e Zubin Potokut nuk nxori vetëm mbetje mortore. Përreth tri lokacioneve në veri të Kosovës, ku u zbuluan varreza masive, janë sekuestruar edhe qindra armë, mitraloza, mjete shpërthyese, granata dore, detonatorë dhe pajisje të tjera ushtarake.

Zbulimi i këtij arsenali ka ngritur dyshime të reja. Autoritetet kosovare kanë ngritur dyshime se armët e gjetura së fundmi mund të jenë përdorur pikërisht për vrasjen e 23 personave, mbetjet kockore të të cilëve u gjetën ditë më parë në të njëjtat zona.

Sasia e madhe e armatimit hap edhe një varg pyetjesh të tjera: si u siguruan këto armë, kush i ka ruajtur dhe nëse pas tyre ka pasur mbështetje nga struktura jashtë Kosovës. Për ekspertët, zbulimi rikthen në fokus rolin e Serbisë në furnizimin me armatim të strukturave serbe në Kosovë.

"Strategjia serbe konsiston në një kombinim metodash dhe taktikash hibride, që kanë për qëllim destabilizimin e vendit duke instrumentalizuar komunitetin serb në Kosovë, me qëllim që t'i përdorë vazhdimisht ata në betejën kundër Kosovës", tha për RTK-në Arben Fetoshi, drejtuesi i Institutit Octopus.

Sipas tij, institucionet vendore po arrijnë t'i mbajnë nën kontroll kërcënimet. "Rreziku gjithmonë është evident, ndonëse kapacitetet e institucioneve tona të sigurisë kanë treguar që konsistojnë vazhdimisht në neutralizimin me sukses të këtyre kërcënimeve, mbi bazën e një koordinimi të vazhdueshëm me partnerët tanë strategjikë, për garantimin e sigurisë në të gjithë territorin e vendit", theksoi Fetoshi.

Zbulimet kanë rigjallëruar edhe thirrjet për një angazhim ndërkombëtar më të fuqishëm. Gjyle Haziri nga shoqata "Zëri i Prindërve" këmbënguli se hetimet mbeten të kufizuara pa bashkëpunim ndërkombëtar dhe pa qasje në arkivat e Beogradit. "Institucionet tona po punojnë sa po mundën, po pa lejen e prokurorëve të institucioneve ndërkombëtare është e kotë, pa i hapë arkivat e Beogradit, nuk mundën institucionet tona me bë kurrgjë", tha ajo.

Gazmend Syla nga OVL-UÇK e lidhi çështjen me plagën e hapur të personave ende të pagjetur. "Është tepër e rëndësishme me i hedhë dritë asaj që ka ndodhë, sepse ju e dini që ne ende sot po gjejmë trupa. Domethënë, ende nuk i kemi edhe 1600 trupa të qytetarëve të vendit tonë, të cilëve s'kemi ku me ua vendos një lule në përvjetorin e rënies së tyre", tha ai.

Institucionet vendore janë zotuar se do të kërkojnë përgjigje për të dëshmuar krimet e luftës dhe se do të vazhdojnë të sigurojnë sundimin e ligjit.