ZPS pas dënimeve në Hagë: Askush nuk është mbi ligjin, do t'i rishikojmë pikat e lëna pa dënim

Zyra e Prokurorit të Specializuar ka dalë me qëndrimin e saj të parë publik pas aktgjykimit ndaj katër ish-krerëve të Ushtrisë Çlirimtare të Kosovës, duke e cilësuar vendimin një pikë kthese për llogaridhënien dhe sundimin e ligjit në Kosovë.

"Vendimi i sotëm, që bazohet vetëm në fakte dhe ligj, është i rëndësishëm për vënien para përgjegjësisë dhe sundimin e ligjit në Kosovë. Gjykata ka konfirmuar se asnjë individ, pavarësisht rangut apo autoritetit politik, nuk është mbi ligjin dhe nuk ka imunitet nga përgjegjësia për krime të rënda ndërkombëtare", ka thënë Prokurorja e Specializuar, Kimberly West, e cila e ka quajtur aktgjykimin drejtësi të vonuar për viktimat.

Trupi gjykues vendosi se secili nga katër të akuzuarit mban përgjegjësi penale individuale për krimet e luftës të arrestimit dhe ndalimit të paligjshëm ose arbitrar, trajtimit mizor, torturës dhe vrasjes së paligjshme. Hashim Thaçi u dënua me 25 vjet burgim, Kadri Veseli me 18 vjet, Rexhep Selimi me 13 vjet dhe Jakup Krasniqi me 25 vjet.

West ka insistuar se procesi nuk prek historinë e luftës, por veprimet e individëve. "ZPS-ja bën përgjegjës individë për veprimet e tyre, në përputhje me mandatin e saj, asgjë më shumë", tha ajo. Sipas komunikatës së ZPS-së, "ZPS-ja nuk ka ndjekur penalisht Ushtrinë Çlirimtare të Kosovës, as luftën e bërë për pavarësinë e Kosovës. Individë të caktuar shfrytëzuan ato rrethana të luftës për të kryer krime të rënda, dhe është për meritë të Kosovës që këta individë nxirren tani para përgjegjësisë".

Prokuroria ka bërë publike edhe peshën e dosjes që i paraqiti gjykatës: 125 dëshmitarë të thirrur për të dëshmuar drejtpërdrejt në sallën e gjyqit dhe rreth 3.000 prova materiale në shumë gjuhë.

Në aktgjykim, sipas ZPS-së, trupi gjykues i gjeti të katërt fajtorë për arrestim dhe ndalim të paligjshëm ose arbitrar kundër të paktën 385 personave, trajtim mizor kundër të paktën 49 personave, torturë kundër 303 personave dhe vrasje të paligjshme kundër të paktën 96 personave. Krimet, thuhet në komunikatë, u kryen kundër qindra civilëve dhe personave që nuk merrnin pjesë në luftime, në periudhën nga prilli i vitit 1998 deri më 20 qershor 1999, në komuna në të gjithë Kosovën dhe në dy rrethe në Shqipërinë veriore.

Pjesa e papërfunduar e llogarisë mbetet te gjashtë pikat e aktakuzës për krime kundër njerëzimit që nuk çuan në dënime. West ka njoftuar se Zyra e saj do ta shqyrtojë me kujdes të gjithë aktgjykimin ditët e ardhshme, përfshirë këto pika, duke shtuar se ZPS-ja mbetet e angazhuar të garantojë llogaridhënien dhe të mbështesë të drejtat e viktimave ndërsa procesi kalon në fazat e mëpasshme.