Zjarri gëlltit malin në Gojan të Pukës, flakët arrijnë në prag të fshatit

Flakët kanë përshkuar thuajse një mal të tërë në Gojan të Pukës dhe tashmë ndodhen në prag të zonave të banuara. Zjarri, që po vijon prej disa ditësh, ka përfshirë sipërfaqe të konsiderueshme pyjore dhe gjatë orëve të natës u përkeqësua ndjeshëm.

Vatrat janë shpërndarë në disa pika të terrenit dhe pamjet nga vendngjarja tregojnë flakë të pakontrolluara që avancojnë drejt fshatrave. Terreni i thyer dhe përmasat që ka marrë zjarri e kanë bërë praktikisht të pamundur ndërhyrjen nga toka.

Përballë rrezikut të drejtpërdrejtë për jetën, prej disa ditësh ka nisur evakuimi i banorëve nga zonat e prekura. Zjarri mbetet nën monitorim, ndërsa përpjekjet përqendrohen te ndalimi i përhapjes së flakëve drejt banesave.

Situata mbetet shqetësuese. Përhapja e shpejtë dhe vështirësia e terrenit po e komplikojnë çdo përpjekje, ndërsa banorët presin një ndërhyrje që të frenojë flakët dhe të garantojë sigurinë e zonave të banuara.