Zjarre aktive në gjashtë komuna të Malit të Zi, kërkohet ndihmë nga ajri

Katër kërkesa për ndërhyrje nga ajri brenda një mëngjesi: kjo është llogaria e parë e ditës për shërbimet e mbrojtjes dhe shpëtimit në Malin e Zi, ku zjarret janë shpërndarë njëkohësisht në territorin e gjashtë komunave.

Drejtori i përgjithshëm i Drejtoratit për Mbrojtje dhe Shpëtim në Ministrinë e Punëve të Brendshme (MPB) të Malit të Zi, Miodrag Beshoviq, bëri të ditur se vatrat aktive u regjistruan që në orët e para të mëngjesit. "Këtë mëngjes janë evidentuar zjarre aktive në territorin e komunave Herceg Novi - Gjenoviq, Danillovgrad - Ponikvice, Kolashin - Cërni Vërh, Maganik dhe Uvaç, Nikshiq - Jasenovo Pole dhe Kërstac, si dhe në territorin e Kryeqytetit Podgoricë - Kërzhanja dhe të Kryeqendrës Cetinë - Bjelle Poljane, i cili është vënë nën kontroll. Shërbimi i Mbrojtjes dhe Shpëtimit i Herceg Novit ka dërguar kërkesë për angazhimin e avionëve për shuarjen e zjarrit në zonën e Gjenoviqit, ndërsa për shkak të situatës në vatrat e zjarrit Kërstac në Nikshiq, Ponikvice në Danillovgrad dhe Kërzhanja në Podgoricë, është kërkuar ndihmë nga ajri edhe në ato lokalitete", tha Beshoviq.

Sipas tij, situata në vatrat e zjarrit është për momentin e qëndrueshme dhe nën mbikëqyrje të vazhdueshme të shërbimeve kompetente. Zjarri në zonën Cetinë-Bjelle Poljane është vënë nën kontroll.

Beshoviq paralajmëroi se gjatë ditës priten edhe kërkesa shtesë për angazhimin e avionëve në lokacione të tjera, nëse këtë e imponojnë intensiteti i zjarreve, drejtimi i përhapjes dhe vështirësia e terrenit.

Koordinimin e ndërhyrjeve e mban Qendra Operative Komunikuese 112 e Ministrisë së Punëve të Brendshme. "Qendra Operative Komunikuese 112 e Ministrisë së Punëve të Brendshme, në koordinim me shërbimet e mbrojtjes dhe shpëtimit dhe institucionet e tjera kompetente, ndërmerr aktivitete me qëllim të angazhimit në kohë të kapaciteteve dhe mbrojtjes së jetës dhe pronës, si dhe të parandalimit të përhapjes së mëtejshme të zjarreve", theksoi Beshoviq.