Zjarr vdekjeprurës në bazën ushtarake kanadeze të Wainwright, flakët dalin jashtë gardhit

Ka të vdekur dhe të plagosur në bazën ushtarake CFB Wainwright në Albertë të Kanadasë, ku një incident i rëndë shkaktoi të shtunën një zjarr të madh që vazhdon të përhapet. "Me trishtim ju njoftoj se ka pasur edhe të vdekur, edhe të plagosur si pasojë e një incidenti në bazë", deklaroi ministri kanadez i Mbrojtjes, David McGuinty, në një konferencë për shtyp të shtunën në mbrëmje.

McGuinty nuk dha shifra për viktimat dhe as nuk tregoi se çfarë e shkaktoi incidentin. Ai e cilësoi situatën "aktive dhe delikate", duke shtuar se zjarri po monitorohej nga afër. "Nuk më kujtohet një incident si ky në të kaluarën e afërt", tha ministri.

Sipas tij, Forcat e Armatosura Kanadeze dhe autoritetet federale, provinciale dhe vendore po bashkërendojnë reagimin ndaj emergjencës. Komuniteti i afërt i Wainwright po ofron mbështetje spitalore dhe ndihmë në shuarjen e zjarrit.

Rrethi Komunal i Wainwright njoftoi se flakët e kaluan gardhin e bazës më herët të shtunën dhe po përhapeshin me shpejtësi për shkak të erërave të forta. Në vendngjarje po ndërhyjnë zjarrfikës nga disa juridiksione, ndërsa deri tani nuk është lëshuar asnjë urdhër evakuimi.

Kryeministri kanadez Mark Carney ishte i pari që e bëri publik rastin, në një postim në rrjetet sociale: "Një incident i rëndë që ka shkaktuar një zjarr të madh ka ndodhur në CFB Wainwright, në Albertë." Ai shtoi: "Mendimet tona janë me të gjitha gratë dhe burrat e guximshëm të prekur."

Kryeministrja e provincës së Albertës, Danielle Smith, e përshkroi zjarrin si "të rëndë dhe tragjik" dhe tha se ai po prek shumë pjesëtarë të ushtrisë. As Carney, as Smith nuk dhanë hollësi mbi shkakun e zjarrit apo mbi të lënduarit.

Nga radhët e opozitës, lideri i Partisë Konservatore, Pierre Poilievre, bëri të ditur se kishte folur me Carney-n dhe me ministrin e Mbrojtjes për t'u ofruar mbështetje të prekurve. "Lutuni për Wainwright, të gjithë", shkroi ai në rrjetet sociale, duke u bërë thirrje banorëve të zonës të ndjekin udhëzimet e emergjencës dhe t'i lënë rrugët të lira për ekipet e shpëtimit.

Baza e Forcave Kanadeze Wainwright ndodhet rreth 180 kilometra në juglindje të Edmontonit dhe është një nga qendrat stërvitore më të ngarkuara të vendit, ku ushtarët përgatiten për operacione luftarake. Aty ndodhen Qendra Kanadeze e Stërvitjes për Manovra, e cila zhvillon ushtrime që riprodhojnë kushtet reale të fushëbetejës, si dhe Qendra e Stërvitjes e Divizionit të 3-të Kanadez.