Zjarr brenda perimetrit të KEK-ut te magjistralja Prishtinë-Pejë: po digjen mbetjet e hirit

Mbetjet e hirit të Korporatës Energjetike të Kosovës kanë marrë flakë te magjistralja Prishtinë-Pejë, ndërsa ekipet e zjarrfikësve janë në terren për ta izoluar plotësisht vatrën e zjarrit.

Komandanti i Brigadës së Zjarrfikësve për rajonin e Prishtinës, Abdusamed Shkodra, tha se zjarri është brenda perimetrit të korporatës dhe se nuk ka rrezik për banorët. "Nga raportimet e ekipit në terren që është duke ndërhyrë, bëhet fjalë për zonën e KEK-ut, përkatësisht mbetje të hirit të tyre, dhe zjarri është brenda perimetrit të korporatës. Nuk ka ndonjë rrezik për djegie të shtëpive apo rrezik për jetën e njerëzve. Konfirmimin zyrtar për zjarrin, e kemi pranuar rreth orës 22:30", deklaroi Shkodra për Klan Kosova.

Sipas tij, situata është nën kontroll dhe nuk paraqet rrezik për vendbanimet përreth apo për jetën e qytetarëve.

Nuk është hera e parë brenda së njëjtës ditë që zjarrfikësit dalin në këtë lokacion: Shkodra tha se ekipet kishin ndërhyrë aty edhe më herët gjatë ditës. Shkaku i zjarrit nuk është bërë i ditur.