Zhytësi ukrainas i kërkuar për shpërthimet e Nord Stream arrestohet në Kroaci

Një burrë ukrainas, zhytës i stërvitur, është arrestuar në Kroaci si pjesë e hetimit për shpërthimet që dëmtuan tubacionet e gazit Nord Stream në vitin 2022, një nga sabotimet më të bujshme të infrastrukturës energjetike në Evropë që nga fillimi i luftës në Ukrainë.

Arrestimi ndodhi ditën e mërkurë në qytetin bregdetar kroat të Pulës. Sipas prokurorisë gjermane, i dyshuari ishte i përfshirë drejtpërdrejt në shpërthimet nënujore. Berlini do të kërkojë ekstradimin e tij, për t'u gjykuar në gjykatën federale të Karlsruhes, në Gjermani.

Shpërthimet nënujore ndodhën në shtator të vitit 2022, vetëm pak muaj pas pushtimit të plotë rus të Ukrainës. Ato dëmtuan tre nga katër tubacionet e ndërtuara për të çuar gazin fosil rus drejt Gjermanisë përmes Detit Baltik.

Prokuroria gjermane deklaroi se i dyshuari "i përkiste një grupi personash, përfshirë Serhiy K-në që ndiqet penalisht veçmas, të cilët vendosën eksplozivë pranë ishullit të Bornholmit në shtator 2022 mbi tubacionet e gazit Nord Stream 1 dhe Nord Stream 2". "I akuzuari mori pjesë në zhytjet e nevojshme," shtoi ajo.

Prokurorët e identifikuan të dyshuarin vetëm si Vladimir Z, por ai besohet të jetë i njëjti burrë që Polonia e arrestoi vitin e kaluar — dhe e liroi pasi një gjykatë polake vendosi kundër ekzekutimit të një urdhri evropian arresti të lëshuar nga Gjermania. Në atë proces, ai u identifikua si Volodymyr Zhuravlev.

Vendimi polak shkaktoi tensione në marrëdhëniet mes Varshavës dhe Berlinit. Gjykata argumentoi se Gjermania nuk kishte juridiksion në çështjen dhe se shkatërrimi i Nord Stream mund të shihej si një veprim i justifikuar i Ukrainës në kuadër të një lufte mbrojtëse. Qëndrimi përkoi me kundërshtimin e hershëm të Polonisë ndaj projektit të tubacionit, i parë si simbol i afërsisë së Berlinit me Moskën. Kryeministri polak, Donald Tusk, ka deklaruar publikisht se "problemi me Nord Stream 2 nuk është se u hodh në erë; problemi është se u ndërtua".

Mediat polake dhe gjermane raportuan se i dyshuari kishte shpëtuar nga arrestimi në Poloni në vitin 2024, duke u kthyer në Ukrainë. Autoritetet polake ia hodhën fajin Gjermanisë për gabime administrative gjatë regjistrimit të tij në bazën ndërkombëtare të personave të kërkuar, çka i lejoi të kalonte kufirin pavarësisht një urdhri arresti aktiv. Revista gjermane Der Spiegel pretendoi se i dyshuari u ndihmua të arratisej nga një atashe ushtarak ukrainas i vendosur në Varshavë.

Arrestimi i dytë i tij — kësaj here në Kroaci — nënvizon vendosmërinë e Berlinit për ta nxjerrë përpara drejtësisë gjermane, pavarësisht ndjeshmërisë politike të rastit në një kohë kur Gjermania mbetet mbështetëse e Kievit kundër agresionit rus.

I dyshuari tjetër, Serhiy K, u arrestua në Itali gushtin e kaluar dhe u ekstradua në Gjermani në nëntor, pas apelesh të pasuksesshme në gjykatat italiane.