Zëvendësministri Mehani raporton kanosje në Skenderaj nga një shofer me Audi

Një shofer me një veturë Audi i doli përpara zëvendësministrit Hysni Mehani në Skenderaj, ndaloi, hapi xhamin dhe e kanosi. Ngjarja ndodhi të shtunën, më 17 tetor, rreth orës 12:20, në rrugën "Idriz Rreci", ndërsa Mehani lëvizte në këmbë.

Mehani është zëvendësministër në Ministrinë e Financave, Punës dhe Transfereve dhe kryetar i degës së Lëvizjes Vetëvendosje në Skenderaj. Sipas deklarimit të tij në Polici, pas kërcënimit shoferi u largua nga vendi. Në ato çaste ai nuk arriti ta identifikonte personin dhe as t'i mbante mend targat e veturës.

Gjysmë ore më vonë, rreth orës 12:50, zëvendësministri u paraqit në Stacionin Policor në Skenderaj dhe e raportoi rastin.

Hetimet policore, sipas portalit Sinjali, çuan te një i dyshuar me inicialet A.V., 46 vjeç. Ai u paraqit në stacion dhe u intervistua nga njësia e hetimeve. Pas konsultimit me prokurorin e shtetit, rasti u cilësua si "Kanosje", ndërsa i dyshuari u lirua në procedurë të rregullt.

Policia e Kosovës nuk ka dhënë ende një qëndrim zyrtar. Rrethanat e incidentit dhe motivi i kanosjes së dyshuar mbeten nën hetim.