Zelensky: Ukraina ndal goditjet, nëse SHBA-ja siguron premtimin e Moskës për infrastrukturën

Premtimi i Kievit ka një çmim të saktë: Ukraina është e gatshme të ndalojë sulmet mbi territorin rus, por vetëm nëse Shtetet e Bashkuara nxjerrin nga Moska një angazhim që ajo nuk do të godasë infrastrukturën ukrainase. Kështu u shpreh të hënën presidenti i Ukrainës, Volodimir Zelenski.

Deklarata e tij erdhi pasi presidenti amerikan, Donald Trump, pohoi se Ukraina dhe Rusia kishin vendosur të ndalin goditjet ndaj objekteve energjetike të njëra-tjetrës, pa dhënë detaje. Një ditë më parë, në një deklaratë në Truth Social, Trump kishte thënë se rritja e çmimeve të naftës së dizelit në botë është "kryesisht e shkaktuar nga lufta Rusi/Ukrainë" dhe "jo nga Irani".

Zelenski e lidhi ndalimin e sulmeve me një kusht të vetëm: që Uashingtoni të sigurohet se Rusia është "vërtet e gatshme të ndalojë këtë luftë që synon shkatërrimin e jetës, dhe të bëjë atë realisht dhe për një afat të gjatë". Vetëm pas kësaj, shtoi ai, Ukraina do të hidhte "hapa deeskalues".

Sipas presidentit ukrainas, Kievi i ka propozuar partnerëve të vet të arrijnë një marrëveshje me Rusinë për ndalimin e sulmeve ndaj infrastrukturës kritike, duke akuzuar Moskën se merr në shënjestër objektet e ushqimit, energjisë dhe objekte të tjera bazë "që mbajnë jetën".

Sulmet e përsëritura ruse ndaj infrastrukturës energjetike të Ukrainës kanë rënduar sistemet e karburantit të nevojshme për ngrohje dhe energji elektrike, duke ngritur frikën se civilët mund të përballen me një dimër të vështirë. "Këto sisteme janë të cenueshme dhe Rusia ka shfrytëzuar këtë cenueshmëri, duke lënë mijëra familje pa energji elektrike ose ngrohje gjatë tre dimrave të kaluar", tha korrespondenti i Al Jazeerës, Dmitry Medvedenko, i cili raporton nga Moska.

Ndërkohë, Ukraina ka dëshmuar në muajt e fundit një kapacitet në rritje për goditje në distancë të largët, duke sulmuar infrastrukturën energjetike ruse larg vijave të frontit. "Ukraina mund të fillojë të përgjigjet në të njëjtën mënyrë, duke goditur sistemet esenciale energjetike, dhe sigurisht Kremlini e kupton se ka një sahat që rrjedh për të dyja palët, për të arritur një konsensus për këtë dimër, që popullatat e tyre të mbahen të ngrohta dhe me energji elektrike", vlerësoi Medvedenko.

Ndërsa diplomacia mbetet në nivel kushtëzimesh, lufta vazhdoi. Të martën në mëngjes të dyja palët shkëmbyen sulme nga ajri: goditjet ruse në Kiev vranë një person dhe plagosën shtatë të tjerë nga fillimi i ditës, bëri të ditur Shërbimi Emergjent Shtetëror i Ukrainës. Dy persona të tjerë u vranë në sulme të veçanta ruse në qytetet ukrainase Sllovjansk dhe Kramatorsk, sipas të njëjtit institucion.

Në anën tjetër, Ministria e Mbrojtjes e Rusisë deklaroi se forcat ruse rrëzuan gjatë natës 222 dronë ukrainas. Mediat ruse raportuan se Ukraina sulmoi me dronë një objekt industrial në Rusi, duke dëmtuar vendin dhe disa ndërtesa banimi në regjionin jugperëndimor të Samarës. Agjencia shtetërore ruse TASS raportoi të martën, duke cituar guvernatorin e regjionit, Vyacheslav Fedorishchev, se ishin rrëzuar rreth 40 dronë. Mediat ukrainase thanë se objekti industrial i vënë në shënjestër ishte një rafineri nafte.