Zelensky: Kievi i dorëzoi SHBA-së propozime të reja për t'i dhënë fund luftës me Rusinë

Kievi i ka dorëzuar Shteteve të Bashkuara një sërë propozimesh të reja që synojnë t'i japin fund luftës katërvjeçare e gjysmë me Rusinë. Lajmin e dha të martën presidenti i Ukrainës, Volodymyr Zelensky, në fjalimin e tij të përnatshëm me video, pa dhënë asnjë detaj për përmbajtjen e propozimeve.

"Ne ua kemi përcjellë propozimet tona palës amerikane", tha Zelensky. Sipas tij, Uashingtoni mund të ndihmojë në forcimin e mbrojtjes së Ukrainës, veçanërisht të mbrojtjes ajrore, duke rritur njëkohësisht presionin mbi Moskën, në mënyrë që Rusia të përgatitet "për t'i dhënë fund luftës në vend që ta zgjasë atë".

Njoftimi erdhi ndërsa si Ukraina, ashtu edhe Rusia lanë të kuptohej se negociatorët amerikanë do të vizitojnë së shpejti të dyja vendet. Negociatorët e SHBA-së, Steve Witkoff dhe Jared Kushner, ishin për herë të fundit në Moskë në janar dhe ende nuk kanë shkuar në Kiev.

Bisedimet për t'i dhënë fund pushtimit rus të Ukrainës, që nisi në vitin 2022, kanë ngecur kryesisht që kur Shtetet e Bashkuara dhe Izraeli nisën luftën e tyre kundër Iranit. Ukraina ka kërkuar vazhdimisht një armëpushim pas viteve luftime. Rusia thotë se dëshiron një zgjidhje, por çdo marrëveshje, sipas Moskës, duhet të përfshijë tërheqjen e plotë të Ukrainës nga katër rajone që Moska i pretendon, si dhe zgjidhjen e "shkaqeve rrënjësore" të konfliktit.

Në po të njëjtin fjalim, Zelensky akuzoi Rusinë se po përgatitet të përdorë zgjedhjet e saj parlamentare të muajit të ardhshëm si pretekst për një mobilizim tjetër ushtarak në shkallë të gjerë. "Ata po përgatiten për mobilizim në vjeshtë, menjëherë pas imitimit të zgjedhjeve parlamentare", tha ai, duke e cilësuar këtë pjesë të një plani për të "krijuar pamjen se rusët gjoja e mbështesin luftën".

Pas "pseudo-zgjedhjeve", sipas Zelenskyt, presidenti rus Vladimir Putin "planifikon një mobilizim shtesë të shpejtë prej disa qindra mijëra rusësh deri në fund të vitit, plus një numër tjetër të ngjashëm vitin e ardhshëm". Zyrtarë në Moskë kanë mohuar më herët se një mobilizim i ri është i nevojshëm.

Të martën, në një zhvillim të veçantë, presidenti amerikan Donald Trump njoftoi se Rusia ka liruar ish-marinsin amerikan Robert Gilman pas katër vjetësh në paraburgim. Trump tha se Putin pranoi ta lironte 32-vjeçarin "mbi baza humanitare" dhe se Uashingtoni nuk liroi asnjë të burgosur në këmbim.

Gilman pritej të mbërrinte të martën në mbrëmje në bazën ajrore Andrews pranë Uashingtonit. SHBA-ja kishte ushtruar presion ndaj Moskës për lirimin e tij, që ai të mund të merrte trajtim mjekësor. Sipas zyrtarëve amerikanë, ai do të vlerësohej nga mjekët gjatë fluturimit, para se të transferohej në një qendër rehabilitimi në San Antonio të Teksasit.